काभ्रे,
नमोबुद्ध नगरपालिकामा जनप्रतिनिधि र कर्मचारीमा कोरोना संक्रमण देखिएपछि नमोबुद्धमा अत्यावश्यक बाहेकका सेवा प्रभावित हुने भएको छ । जनप्रतिनिधिसहित नगरपालिकाका धेरै कर्मचारीमा कोभिड–१९ को संक्रमण देखिएको छ । नगर प्रमुख टी.पी. शर्मा तिमल्सिना, उपप्रमुख रामदेवी तामाङ, प्रमुख प्रशासकीय अधिकृत राजन पौडेल लगायतलाई कोभिड–१९ संक्रमण पुष्टि भएको छ । नगर प्रमुख तिमल्सिनालाई माघ १ गते संक्रमण पुष्टि भएको थियो भने उपप्रमुख तामाङ, प्रमुख प्रशासकीय अधिकृत पौडेललाई आज (मंगलबार) संक्रमण पुष्टि भएको हो ।
प्रमुख प्रशासकीय अधिकृत पौडेलका अनुसार नगरपालिकामा हाल १६–१७ जना कर्मचारीमा कोरोना संक्रमण पुष्टि भइसकेको छ । जनप्रतिनिधि र कर्मचारीमा संक्रमण पुष्टि भएसँगै कम्तीमा एक साता नगरपालिकामा अत्यावश्यक बाहेकका सेवा प्रभावित हुने प्रमुख प्रशासकीय अधिकृत राजन पौडेलले जानकारी दिएका छन । नमोबुद्ध नगरपालिकाले नगर क्षेत्रभित्र अनावश्यक भीडभाड नगर्न, बाहिर निस्कदा सामाजिक दूरी कायम गर्दै स्वास्थ्य सजगता अपनाउन, कुनै लक्षण देखिए स्वास्थ्यकर्मीलाई सम्पर्क गर्न आग्रह गरेको छ । जिल्ला स्वास्थ्य कार्यालय काभ्रेको आजको तथ्यांकअनुसार नमोबुद्ध नगरपालिकामा ५१ जना सक्रिय संक्रमित छन् ।
