तेमालमा विदुर एवं एकल पुरुषलाई पनि मासिक भत्ता

काभ्रे,

तेमाल गाउँपालिकाका विदुर एवं एकल पुरुषहरुले पनि अबदेखि सामाजिक सुरक्षा भत्ता पाउने भएका छन् । यो आर्थिक वर्षमा करीव १ सय १० जनाले मासिक २ हजार रुपैयाँका दरले यस्तोे भत्ता पाउने तेमाल गाउँपालिका सामाजिक शाखा प्रमुख उद्धवप्रसाद पाण्डेले जानकारी दिएका छन । गाउँपालिकाको आर्थिक वर्ष २०७८÷०७९ को नीति,कार्यक्रम र बजेट अनुसार यो कार्यक्रम कार्यन्वयन गर्न लागिएको गाउँपालिकाका अध्यक्ष सलाम सिं तामाङले जानकारी दिएका छन । गाउँपालिका उपाध्यक्ष दुर्गामाया तामाङले लक्षित वर्गमा आवश्यक देखिएर नै आर्थिक वर्ष २०७८÷०७९ को नीति,कार्यक्रमसहित बजेट बनाएको र सोही अनुसार यो कार्यक्रम हुने बताईन । सरकारले दलित बालबालिका,अपांगता भएका व्यक्ति,एकल महिलालाई भत्ता दिदै आएको सन्दर्भमा तेमालका विदुर एवं एकल पुरुषहरुलाई पनि सहायता आवश्यक रहेको हुदाँ यस खालको सामाजिक सुरुक्षा भत्ता कार्यक्रम जोडिएको बताईएको छ ।
तेमाल गाउँपालिकाको एकल पुरुष सामाजिक सुरक्षा भत्ता वितरण सम्बन्धी बनेको कार्यविधि २०७८ को दफा ३ बमोजिम भत्ता वितरण गरिने प्रमुख प्रशासकीय अधिकृत केदार प्रसाद ढकालले प्रष्ट पारका छन । श्रीमती बितेर एक्लो भएका विदुर र विवाह नगरी बसेका ६० देखि ७० वर्षसम्मका व्यक्तिले विदुर एवं एकल पुरुष सामाजिक सुरक्षा भत्ता पाउने कार्यविधिमा उल्लेख रहेको छ । यहि कार्यविधि अनुसार यसअघि वडा कार्यालयहरुमार्फत नाम दर्ता गराएका व्यक्तिहरुलाई भत्ता वितरण गर्न लागिएको पालिकाले सूचनामार्फत जानकारी गराइएको छ ।