नमोबुद्धः
काभ्रेको नमोबुद्ध नगरपालिकाले सरोकारवालाहरुको लागी बाल मैत्री स्थानीय शासन बिषयमा आज एक दिने गोष्ठी सञ्चालन गरेको छ। बाल मैत्री नगर बनाउन सरोकारवालाहरुलाई सक्रिय बनाउने उद्देश्यले यो कार्यक्रम गरिएको महिला तथा बालबालिका शाखा प्रमुख तारा सुनुवारले जानकारी दिएकी छिन्। उक्त कार्यक्रमको उद्घाटन गदै प्रमुख जिल्ला अधिकारी हुमकाला पाण्डेले बालबालिकाको सर्वांगीण विकासमा सबै पक्षले गम्भीरतापुर्वक ध्यान दिनुपर्ने बताएकी छिन्।
स्थानीय सरकारले बालबालिकाको बिषयमा भने जति नै आवाज उठाएतापनि बजेटमा जोड्न नसकेको गुनासो सरोकारवालाहरुले राखेका छन्।
कार्यक्रमको समापन गदै नमोबुद्ध नगरप्रमुख कुन्साङ लामाले बालबालिकाको लागी नगरपालिकाले गर्नुपर्ने सबै सहयोगका लागी आफु तत्पर रहेको बताएका छन्। लामाले वडा तहका जनप्रतिनिधि लगायत सरोकारवालाहरुलाई पनि, बालबालिकाको बिषयलाई ध्यानमा राखी योजना निर्माण गर्न अनुरोध गरेका छन्। कार्यक्रममा वडा नं १ देखी ११ सम्मका जनप्रतिनिधि लगायत विद्यालय व्यवस्थापन समितिका अध्यक्ष, प्रधानाध्यापक ,नगरपालिकाका प्रमुख,उपप्रमुख ,११ ओटै वडाका जनप्रतिनिधि,नगरपालिकाको कर्मचारीहरुको उपस्थिति रहेको थियो।
नमोबुद्ध नगरपालिकामा २०७४ सालमा विभिन्न गैर सरकारी संस्थासँग समन्वय गरी सामाजिक सुरक्षा शाखा प्रमुख श्याम खनालको पहलमा ३४ लाखको बाल अक्षय कोष स्थापना गरिएको थियो । अभिभावक विहिन, गरिब तथा जेहेन्दार बालबालिकाको लागी स्थापना गरिएको कोषमा अहिले ४० लाख रुपया रहेको खनालले जानकारी दिएका छन्।
