काभ्रे,
नेपाली काँग्रेसको स्थानीय तह निर्वाचनलाई दृष्टिगत गरी देशका १० सहरमा चुनावी सभा आजबाट सुरु भएको छ । काँग्रेसका शीर्ष नेताहरूले सम्बोधन गर्ने गरी वैशाख २१ बुधबारदेखि २७ गतेसम्मको चुनावी सभाको तालिका सार्वजनिक भएको छ । सभाको पहिलो दिन आज आज मोरङको विराटनगरमा हुने सभालाई प्रधानमन्त्री तथा नेपाली काँग्रेसका सभापति शेरबहादुर देउवा, वरिष्ठ नेता रामचन्द्र पौडेल, महामन्त्री विश्वप्रकाश शर्मासहितका नेताहरूले सम्बोधन गर्ने बताईएको छ ।
त्यसैगरि, वैशाख २२ गते चितवनको भरतपुरमा ,२३ गते काठमाडौँ ,२४ गते बिहान ११ बजे रुपन्देहीको बुटवल, तनहँुको दमौली र दिउँसो २ बजे धनुषाको जनकपुरधामको चुनावी सभामा सभापति देउवा, नेता पौडेलसँगै सहमहामन्त्री भीष्मराज आङ्देम्बे, महेन्द्र यादवसहितका नेताहरूले सम्बोधन गर्ने भएका छन । २५ गते बिहान ११ बजे कास्कीको पोखरा र दिउँसो २ बजे दाङको तुलसीपुर , २६ गते कैलालीको धनगढीमा र अन्तिम दिन २७ गते डडेल्धुरामा चुनावी सभाको आयोजना गरिने छ ।
स्थानीय तह निर्वाचनको प्रचारप्रसारका लागि स्थानीय तह निर्वाचन केन्द्रीय परिचालन समितिको निर्णयअनुसार चुनावी सभा तय गरिएको नेपाली काँग्रेसका मुख्यसचिव कृष्णप्रसाद पौडेलले बताएका छन ।
