नेपाल महिला संघ नमोबुद्ध नगर कार्यसमिति द्धारा जनप्रतिनिधीलाई सम्मान

काभ्रे,

नेपाल महिला संघ नमोबुद्ध नगर कार्यसमितिले स्थानीय तहको निर्वाचनमा कांग्रेसको तर्फबाट निर्वाचित जनप्रतिनिधीलाई सम्मान गरेको छ । हिजो (शनिवार) भकुण्डेवेशीमा आयोजित कार्यक्रममा संविधान सभा सदस्य समेत रहेका कांग्रेस काभ्रेका सभापति तिर्थ लामाले नगरप्रमुख कुन्साङ लामा, वडाअध्यक्ष, कार्यपालिका सदस्य, सदस्यहरुलाई सम्मानसहित बधाई ज्ञापन गरेका हुन् । कार्यक्रममा नगर प्रमुख कुन्साङ लामाले सबैको मिहेनतका कारण कांग्रेस जितेको भन्दै सबै प्रति आभार प्रकट गरेका छन् । उनले विधी र कानून भन्दा एक इञ्च पनि तल रहेर काम नगर्ने बताउदै कानून विपरितका कुनै पनि काम नगर्ने प्रतिवद्धता व्यक्त गरेका छन् ।
उनले टोल–टोलमा सामाजिक सुरक्षा भत्ता वितरण गर्ने आफ्नो तयारी रहेको भन्दै सम्बन्धित बैंकहरुसंग छलफल गरिसकेको जानकारी दिएका छन् । कार्यक्रममा बोल्दै जिल्ला सभापति लामाले संगठनको बलमा कांग्रेसले विजयी हासिल गरेको भन्दै नगर सभापति कुन्साङ लामासहित सबै कार्यसमिति, भातृ तथा सुभेच्छुक संघ संस्था र वडा कार्यसमिति र सबै कृयाशिल र शुभेच्छुकहरुको मिहेनतको प्रतिफल नै कांग्रेसको जित भएको बएका छन् । जनप्रतिनिधीका हरेक कृयाकलाप जनताले निगरानी गरिरहेको हुने भन्दै उहाँले अनुशासनमा रहेर काम गर्न जनप्रतिनिधीहरुलाई निर्देशन दिएका छन् । त्यस्तै, नेपाली कांग्रेस काभ्रेका सचिव गुणराज मोक्तानले गठबन्धनका कारण महिला सहभागिता केही खुम्चिएको स्विकार्दै महिलालाई पार्टी र संसदीय फाँटमा सबैभन्दा धेरै अबसर दिने पार्टी कांग्रेस नै भएको इतिहासले पुष्टी गरेको बताएका छन् ।

महाधिवेशन प्रतिनिधी समेत रहेका नेपाल प्रेस युनियनका उपाध्यक्ष इश्वरी ओझाले अघिल्लो स्थानीय तहको निर्वाचन हारेको कांग्रेस निरन्तर जनताको विचमा रहेको कारण यो पटक जित हासिल गरेको बताईन् । कांग्रेस महाधिवेशन प्रतिनिधी रमिला अधिकारीले सबैलाई समान अवसर दिएर कांग्रेसले नमोबुद्धलाई नमुना नगर बनाउने विश्वास व्यक्त गरेकि छिन् । महिला संघ नमोबुद्धकी सभापति शान्ता पाठक नरालले महिलालाई लैंगिक हिंसा बारे जानकारी दिन तालिम, प्रशिक्षण, प्रतिरक्षा तालिम र निःशुल्क सेनेटरी प्याडको व्यवस्था गर्न माग गरेकि छिन् । नमोबुद्ध नगरपालिकामा कांग्रेसले नगरप्रमुख, ५ वडाअध्यक्षसहित ३१ जना नगर सभा सदस्यमा जित हासिल गरेको छ । २१ सदस्यीय नगर कार्यपालिकामा कांग्रेसका १४, माओवादी केन्द्र र एमालेको ३÷३ र १ स्वतन्त्र निर्वाचित बनेका छन् ।