काभ्रे,
बनेपा नगरपालिकाले गौरवको आयोजना अन्तर्गत बनेपा नगरपालिका वडा नम्बर ५ र ६ नम्बर वडामा डेढ किलोमिटरको १६ सय सिँढी निर्माण कार्य सम्पन्न गरेको छ । निर्माण सम्पन्न गरेको सिँढीको जनप्रतिनिधिहरूले अवलोकन पनि गरेका छन् । नयाँ वर्षको प्रारम्भ देखि नै उक्त सिँढी मार्ग सञ्चालनमा आउने भएको बताइएको छ । बनेपा नगरपालिका र पर्यटन मन्त्रालयको पाँच करोड ३५ लाख रुपैयाँको लागतमा आयोजनाको निर्माण सुरु गरिएको उक्त सिँढीको ८ फिट चौडाइ, साइड ड्रेन, पार्किङ, बगैँचा, सार्वजनिक शौचालय, पिकनिक स्पोर्ट लगायतका संरचनाहरू सिँढीको आसपास निर्माण हुने बताईएको छ ।
बनेपा नगरपालिका वडा नम्बर ५ का अध्यक्ष बलराम अधिकारीले बनेपा आसपासका क्षेत्रहरूको समेत अवलोकन गर्ने गरी स्थानीय आयआर्जनमा समेत टेवा पुग्ने गरी सिँढी निर्माण गरिएको बताएका छन । चण्डेश्वरी मन्दिर देखि गोसाई स्थानसम्मको मार्गलाई धार्मिक पर्यटनका रूपमा विकास गर्न सिँढी निर्माण गरिएको उपप्रमुख रेखा सापकोटा दाहालले बताएकि छिन । दुई चरणमा उक्त सिँढीको संरचना निर्माणका लागि बोलपत्र आव्हान गरिएको थियो । रोजगारी सिर्जना समेत गर्ने उक्त योजनालाई गौरवको योजना मानेर निर्माण गरिएको हो । अवलोकनका लागि नगर प्रमुख लक्ष्मीनरसिंह बादे श्रेष्ठ, उपप्रमुख रेखा सापकोटा दाहाल, प्रमुख प्रशासकीय अधिकृत कविराज उप्रेती, वडा अध्यक्षहरू, कर्मचारीहरूको सहभागिता रहेको थियो । धार्मिक तथा पर्यापर्यटनको उदेश्यले निर्माण सुरु गरिएको सिँढी मार्फत नगरपालिकाले नागरिकहरूको स्वास्थ्य तथा आन्तरिक आयमा जोड दिएको छ ।
