बेथानचोक गाउँपालिकाको दशौँ गाउँसभाले तोक्यो गाउँपालिकाको प्रमुख प्रशासकीय भवन

भकुण्डेबेसी
जिल्लाको बेथानचोक गाउँपालिकाले आफ्नो दशौ गाउँसभा सोमबार सम्पन्न गरेको छ । गाउँसभा गाउँपालिका अध्यक्ष प्रेमबहादुर तिमल्सिनाको सभापतित्वमा गाउँसभा सदस्य सचिब प्रमुख प्रशासकीय अधिकृत राजेन्द्र भण्डारीले संचालन गरेका थिए ।
नेपालको संविधान बमोजिम गाउँपालिकाको केन्द्र परिवर्तन गर्नका लागि स्थानीय तहको पहिलो निर्वाचनबाट निर्वाचित जनप्रतिनिधिहरुले ६ महिना भित्र गर्नुपर्ने ब्यवस्था रहेको छ । नेपाल सरकारले राजपत्रमै साबिक ढुङ्गखर्क गाबिसको कार्यालय रहेको स्थानलाई गाउँपालिका केन्द्र तोकेको थियो भने गाउँपालिकामा निर्वाचित जनप्रतिनिधिले हालसम्म पनि केन्द्र हेरफेर गरेका छैनन् ।गाउँपालिका केन्द्र तोकिएको भवन साबिक ढुङ्गखर्क गाबिसको भवनमा २ नम्बर वडा कार्यालय संचालन गर्नुपर्ने भएको र गाउँपालिकाको लागि आवश्यक प्रशासनिक कार्य संचालनका लागि कोठाहरु अभाव भएकोले गाउँपालिका हाल मुक्तेश्वर महादेव मन्दिरको भवनमा भाडामा संचालन हुँदै आएको छ तर दशौ गाउँसभाले साबिक ढुङ्गखर्क ८ नम्बर गेल्डुङमा रहेको ढुङ्गखर्क स्वास्थ चौकीको ४ रोपनी जग्गामा बनेका संरचनामा गाउँपालिका प्रमुख प्रशासकीय भवन तोकेको छ । गाउँपालिकाले केन्द्र हेरफेर नगरी राजपत्रमा उल्लेख भएकै स्थानमा गाउँपालिका भवन तोकेको हो ।ढुङ्गखर्क स्वास्थ चौकी र बर्थिङ सेण्टरका लागि गाउँपालिका जग्गा खरिद गरि पुर्वाधार बिकास कार्यालय काभ्रेको आर्थिक सहयोगमा भवन निर्माण गरिरहेको छ । गाउँसभामा सबै वडा अध्यक्षहरुले ५ बर्षसम्मको समिक्षा गर्दै आफ्ना भनाइ राखेका थिए भने विषयगत शाखाहरुले कार्यप्रगति प्रस्तुत गरेका थिए ।