काभ्रे,
सातौं राष्ट्रिय प्रोफेसनल आइटिएफ तेक्वान्दो च्याम्पियनसिप बनेपामा सम्पन्न भएको छ । जसमा महाभारत घर भएका आयोजक काभ्रे जिल्ला आईटीएफ तेक्वान्दो संघका रिक्साङ तामाङ च्याम्पियन बनेका छन् । बनेपामा भएको प्रतियोगिताको फाइनलमा रिक्साङले बाग्मती प्रदेशका अनिल तामाङलाई पराजित गर्दै ट्रफीसहित नगद ७५ हजार रुपैयाँ प्राप्त गरेका छन् । त्यसैगरि दोस्रो स्थानमा अनिल तामाङ र तेस्रो स्थानमा सागर वि.क रहेका छन् । दोस्रो र तेस्रो स्थानमा पर्न सफल भएका उनीहरुले क्रमशः ५० हजार र २५ हजार रूपैयाँ नगद पुरस्कार प्राप्त गरेका छन् । राष्ट्रिय खेलकुद परिषद्का सदस्य–सचिव टंक लाल घिसिंङले एक कार्यक्रमबीच प्रतियोगिताको उद्घाटन गरेका थिए । प्रतियोगितामा आयोजकसहित सात प्रदेश र दुई विभागीय टोली सशस्त्र प्रहरी बल एपिएफ र नेपाल आर्मी क्लबका खेलाडीले प्रतिस्पर्धा गरेको थिए । प्रतियोगितामा सहभागी हुन प्रत्येक टिमबाट ३ खेलाडी छनोट भएर आउनु पर्ने प्रावधान रहेको थियो ।
उद्घाटन समारोहको अवसरमा सदस्य–सचिव घिसिङले यस किसिमका व्यवसायिक खेलले नेपालको खेल विकासमा मात्र नभई खेलाडीलाई आर्थिक सहायता पनि मिल्ने बताउदै आफुले यो खेललाई नवौं राष्ट्रिय खेलकुदका लागि आइटिएफको टेस्ट परीक्षाका रूपमा पनि लिएको बताएका छन् । व्यावसायिक खेल प्रतियोगिताहरूले नेपालको खेलकुद विकासमा ठूलो मद्दत पुग्ने उल्लेख गर्दै यो प्रतियोगिताले यहाँका युवा प्रतिभालाई उत्प्रेरणा मिल्ने सदस्य–सचिव घिसिङले बताएका छन् । नेपाल अन्तराष्ट्रिय आईटिएफ तेक्वान्दो महासंघका अध्यक्ष अन्जन धमलाले पछिल्लो समय नेपालको खेलकुदमा सदस्य–सचिव घिसिङको निरन्तरताले आशाको किरण पलाएको बताएका छन् ।
कार्यक्रममा बनेपा नगरपालिकाका मेयर शान्तिरत्न शाक्य, इन्टरनेसनल स्कुल स्पोर्ट्स फेडेरेसन (आईएसएफ) का कार्यकारी सदस्य एवम् अखिल नेपाल खेलकुद महासंघका वरिष्ठ उपाध्यक्ष राजकुमार कार्कीलगायतको उपस्थिति थियो ।
