काभ्रे,
स्थानीय तह सदस्य निर्वाचन २०७९ अन्तर्गत रोशीमा नव निर्वाचित जनप्रतिनिधिहरुको सपथ ग्रहण कार्यक्रम सम्पन्न भएको छ । निर्वाचन अधिकृतको कार्यालय रोशी गाउँपालिकाको आयोजनामा रोशी गा.पा.को सभाहलमा सपथ ग्रहण कार्यक्रम सम्पन्न भएको हो । नव निर्वाचित जनप्रतिनिधिहरुको सपथ ग्रहण सँगै जनप्रतिनिधिहरुलाई प्रमाणपत्र वितरण गरिएको छ ।
समारोहको सभापति तथा निर्वाचन अधिकृत सूर्यप्रसाद गौतमले निर्वाचन अवधिभर सभ्य, मर्यादित र शान्तिपूर्ण ढंगले सम्पन गर्न योगदान पुर्याएका कर्मचारी, प्रहरी प्रशासन लगायत सम्बन्धित सरोकारवाला निकायलाई धन्यवाद व्यक्त गर्दै नव निर्वाचित रोशी गाउँपालिका अध्यक्ष दिनेश लामा, उपाध्यक्ष मिम बहादुर वाइवा लगायत रोशी १ देखि १२ सम्मका सम्पूर्ण जनप्रतिनिधिहरुलाई सफल कार्यकालको शुभकामना व्यक्त गरेका छन् ।
त्यसैगरी नेपाली काँग्रेस काभ्रे जिल्ला सभापति तथा संविधान सभा सदस्य तिर्थ लामाले पनि नव निर्वाचित जनप्रतिनिधिहरुलाई रोशीको आवश्यकतालाई परिपूर्ति गर्दै विकास र समृद्धिको निम्ति आ आफ्नो तर्फबाट भूमिका निभाउनको निम्ति आग्रह गर्दै सफल कार्यकालको शुभकामना व्यक्त गरेका छन् ।
कार्यक्रममा नेपाली काँग्रेस काभ्रेको जिल्ला सचिव गुणराज मुक्तान, ने.क.पा. माओवादी केन्द्र रोशी गा.पा.को अध्यक्ष मानविर लामा, नेकपा एमालेको जिल्ला सदस्य पूर्ण चन्द्र सिग्देल, निबर्तमान रोशी गा.पा. उपाध्यक्ष लक्ष्मी बर्तौला, रोशी गा.पा. प्रमुख प्रशासकिय अधिकृत राम बहादुर तामाङ लगायत विविन्न दलका नेता तथा समाजसेवीहरुको उपस्थिति रहेको थियो ।
