वर्षायाम सुरु भएसँगै पानीजन्य सरुवा रोगको सङ्क्रमण बढ्दैः स्वास्थ्यको ख्याल गर्न विज्ञहरूको अनुरोध

काभ्रे,

वर्षायाम भाइरस र ब्याक्टेरियाका लागि उपयुक्त मौसम भएकाले स्वास्थ्यको ख्याल गर्न विज्ञहरूले अनुरोध गरेका छन् । पछिल्लो २ महिनायता बिरामी भएर अस्पताल पुगेका बिरामीहरूमध्ये २० प्रतिशतभन्दा बढिलाई पानीजन्य सरुवा रोगको सङ्क्रमण देखा परेको छ । शुक्रराज ट्रपिकल तथा सरुवा रोग अस्पतालमा २ महिना अघिसम्म झाडापखालाका दैनिक १÷२ जना मात्रै बिरामी आउने गरेकोमा अहिले १४ जनाभन्दा बढि बिरामी आउने गरेको अस्पतालका प्रवक्ता डाक्टर किजन भट्टराईले जानकारी दिएका छन् ।
गर्मी महिना र वर्षाको मौसम सुरु भएसँगै दुषित पानी र खानाका कारण विशेषगरि टाइफाइड, झाडापखाला, भाइरल हेपाटाइटिस, आउँ, हैजा, डेङ्गी,मलेरिया, भाइरल ज्वरो जस्ता रोगको जोखिम देखिन्छ ।स्वास्थ्य व्यवस्थापन सुचना प्रणालीका अनुसार गत वर्ष पानीजन्य रोगबाट चार सय ९१ जनाको मुत्यु भएको थियो भने २७ हजार एक सय ७६ जना सङ्क्रमित भएका थिए । गत वर्षको तुलनामा यसपटक सङ्क्रमित हुने दर थप बढेको शाखाका प्रमुख डाक्टर अनिल थापाले बताएका छन् ।