काभ्रे,
संविधान र ऐनमा भएको व्यवस्था मिलाएर स्थानीय तहको निर्वाचन हुने नेपाली काँग्रेसका सहमहामन्त्री बद्री पाण्डेले बताएका छन् । नेपालको संविधान २०७२ मा स्थानीय तहको जनप्रतिनिधिको कार्यकाल सकेको छ महिना भित्र निर्वाचन हुनुपर्ने र ऐनमा कार्यकाल सकिनु भन्दा दुई महिना अगाडि निर्वाचन हुनुपर्ने व्यवस्था रहेकोमा राष्ट्रिय सहमति गरेर दुवैलाई मिलाएर सरकारले निर्वाचन गर्ने सहमहामन्त्री पाण्डेले बताएका छन । काभ्रे जेसिसको कार्यक्रममा भाग लिन काभ्रे आएका पाण्डेले नेपाली काँग्रेस काभ्रेको कार्यकर्ता भेटघाटमा जिल्ला पार्टी कार्यालयमा सो कुरा बताएका हुन ।
पार्टीको महाधिवेशन पश्चात् पार्टीको सबै समिति सकृय हुनुपर्नेमा काम सकेर आराम गरेजस्तो देखेकोमा पाण्डेले असन्तुष्टि पनि व्यक्त गरेका छन । पार्टीको जुनसुकै तहले प्रशिक्षण कार्यक्रम राखेपानि आफु आएर पार्टीको कार्यकर्तालाई प्रशिक्षण दिने सहमहामन्त्री पाण्डेले प्रतिबद्धता जनाएका छन । कार्यकर्ता भेटघाटमा नेपाली काँग्रेस काभ्रेको उपसभापति रमशे हुमागाई, अग्रज नेता शंखबुद्ध लामा, सचिवहरु गुणराज मुक्तान,माधव ढकाल सहसचिवहरु रविन्द्र सिग्देल, समीर व्यान्जु, क्षेत्रीय सभापति रामहरि श्रेष्ठ लगायत विभिन्न तहको कार्यकर्ताहरुको उपस्थिति रहेको थियो भने जिल्ला सभापति तिर्थ लामा भने अस्वस्थताका कारण सहभागी हुन सकेका थिएनन् ।
