रोशी सहकर्मी,
कार्तिक २१,

काभ्रेपलाञ्चोक र मकवानपुर जिल्लाको विकट क्षेत्रमा पिको हाईड्रोबाट १७ किलोवाट विजुली निकालिएको छ । दुई गाउँपालिकाका १ सय ४९ घर धुरी उक्त विजुलीको सेवाबाट लाभान्वित भएका छन् ।
विद्युत्त प्राधिकरणको केन्द्रिय प्रसारण लाईन नपुगेको काभ्रेपलाञ्चोक जिल्लाको खानिखोला गाउँपालिका वडा नम्वर ६ स्थित नारायणखोला पिको हाईड्रो विद्युत्तिकरण आयोजना उपभोक्ता समितिले ७.५ किलोवाट र मकवानपुर जिल्लाको राक्सिराङ्ग गाउँपालिका वडा नम्वर ६ मा रहेको डिङना खोला पिको हाईड्रो उपभोक्ता समितिबाट ९.६ किलोवाट विजुली उत्पादन गरेको छ ।
खानिखोला गाउँपालिकाका ५३ घर धुरी र राक्सिराङ्ग गाउँपालिकाका ९६ घर धुरी उक्त आयोजनाबाट लाभान्वित भएका छन् । साईमन्पु फाउण्डेशन र इको इनर्जि फिनल्याण्डको आर्थिक सहयोग, ग्रामिण प्रविधि केन्द्र ललितपुरको प्राविधिक सहयोग, घट्टधनी संघ काभ्रेको सामाजिक सहयोगबाट उक्त परियोजना सम्पन्न भएको हो । परियोजना सम्पन्न भएपछि स्थानीयहरुले विजुलीको माध्यमबाट वातावरणमैत्री सुधारिएको घट्ट, कुखुरापालन, सिलाई ब्यवसाय, अन्य उत्पादन र आयमुलक कार्य शुरु गरेका छन् ।

Facebook Comments