माघ २८,
२०७७,काभ्रे/

नगरभित्र कृषि क्षेत्रको विकास गर्ने एवं कृषि क्षेत्रलाई थप उत्पादनमुखी बनाउने उद्देश्यले नमोबुद्ध नगरपालिकाका अगुवा कृषकका लागि एक दिने तालिम एवं कृषि सामग्री वितरण कार्यक्रम मंगलबार सम्पन्न भएको छ ।

नगरपालिकाका अगुवा कृषकका लागि तरकारी बालीमा बाली उत्पादनोपरान्त (पोष्टहार्भेष्ट) हुने क्षति न्यूनिकरण र बजार व्यवस्थापन बारे तालिम दिइएको हो । तालिममा नगरपालिकाका विभिन्न वडाका कृषक समूह र कृषि फर्मबाट २५ जना कृषक प्रतिनिधिको सहभागिता रहेको थियो । सहभागीहरुलाई कृषि विकास शाखा प्रमुख रेशमवहादुर दाहालसहित कृषि शाखामा कार्यरत शारदा तिमल्सिना र मनिता तामाङले प्रशिक्षण दिएका थिए ।

तालिमको समापन गर्दै नगर प्रमुख टिपी शर्मा तिमल्सिनाले आफूहरु निर्वाचित भएदेखि नै कृषि क्षेत्रमा नमोबुद्ध नगरलाई अगाड बढाउन विभिन्न योजनाहरु तयार पार्दै कार्यान्वयनमा गएको बताए । उनले कृषि क्षेत्रको विकासका लागि कार्यविधि तयार पारिएको र चाँडै नै कार्यान्वयनमा आउने पनि बताए । शुन्यको अवस्थाबाट कृषि क्षेत्रका लागि बर्सेनी बजेटमा वृद्धि गरिएको जानकारी दिँदै उनले अझै पनि कृषि क्षेत्रमा जनशक्तिको अभाव झेल्नुपरेको बताए । विभिन्न संघसंस्थाको सहयोगमा कृषि नलेज पार्कको स्थापना, बेमौसमी तरकारी खेती तथा बिउ उत्पादनमा जोड दिइएको उनले बताए । अव खेती प्रणालीलाई व्यवसायिक बनाउनुपर्ने र युवा जनशक्तिलाई कृषि क्षेत्रमा आकर्षित गर्नुपर्ने तिमल्सिनाको भनाई थियो ।

कार्यक्रममा नगरपालिकाका प्रमुख प्रशासकीय अधिकृत राजन पौडेलले प्रविधिको प्रयोग नगरेसम्म कृषक सधैं कमजोर हुने भन्दै अब परम्परागत र निर्वाहमुखी कृषि प्रणालीबाट आधुनिकीकरणतर्फ जानुपर्ने बेला आइसकेको बताए । प्रविधिको प्रयोगले उत्पादन बढाउन सकिने र त्यसले कृषकको आयस्तरसमेत बढ्ने उनले बताए । गुणस्तरीउ उत्पादनका साथै बढी भन्दा बढी बजारीकरणमा जोड दिनुपर्ने पौडेलको भनाई थियो । कार्यक्रममा वडा नं. ९ का अध्यक्ष एवं नगरपालिकाको कृषि समितिका संयोजक मेलवहादुर लामाले नगरपालिकाले कृषकको हकहितका लागि विगतदेखि नै काम गर्दै आएको र आगामी दिनमा थप व्यवस्थित एवं प्रभावकारी बनाउँदै लैजान बताए । कृषि क्षेत्रमा आधुनिकीकरणमा जोड दिनुपर्ने भन्दै उनले अनुदानमा दिइने सामग्रीको उचित प्रयोग गर्न कृषकहरुलाई आग्रह गरे ।

कार्यक्रमकै अवसरमा अगुवा कृषकका लागि थोपा सिञ्चाई सेट, प्लाष्टिक पोखरी र टनेल खेतीका लागि प्लाष्टिक सेट एवं बेमौसमी तरकारीका बिउ वितरण गरिएको थियो । प्लाष्टिक पोखरी २५ थान, प्लाष्टिक टनेल २२ थान, थोपा सिञ्चाई सेट १५ तथा तथा आवश्यक तरकारीका बिउ वितरण गरिएको कृषि विकास शाखा प्रमुख रेशमवहादुर दाहालले जानकारी दिएका छन् । कार्यक्रम नमोबुद्ध नगरपालिका कृषि विकास शाखाको आयोजना तथा फलफूल तथा तरकारी मुल्य श्रृंखला विकास आयोजनाको सहयोगमा सम्पन्न भएको हो ।

Facebook Comments