काभ्रे,
आजबाट काभ्रेका क्रसर उद्योगहरु पुनः संचालनमा आउने भएका छन् । सरकारले अबैद्य भनेर रोकेर राखेका क्रसर उद्योगहरु खोल्न दिने निर्णय गरे सँगै आजबाट काभ्रेका क्रसर उद्योगहरु संचालन हुने भएका हुन् । हिजो (शुक्रबार) जिल्ला समन्वय समिति काभ्रेको आयोजनामा नदी जन्य वस्तुको उत्खनन्, संकलन र बिक्री सम्बन्धी प्रकृयाको अनुुगमन गर्न गठित समिति र व्यवसायीसँगको बैठक पछि प्रकृया पूरा गरेका खानीहरु संचालनका लागि अनुमति दिने निर्णय भएको हो । जिल्लामा आजबाट ३२ खानी तथा २६ओटा क्रसरहरु पुनः संचालन हुनेछन् । विना अनुमतिपत्र चलिरहेको क्रसर उद्योगहरु भने संचालन नहुने बैठकले निर्णय गरेको छ । मापदण्ड पुरा गर्नका लागि आगामी असार मसान्तसम्मको समय सीमा दिने गरी दर्ता भएका उद्योगहरु चल्न दिने सरकारको निर्णय बमोजिम काभ्रेका खानीहरु पनि आवश्यक मापदण्ड पुरा गरि संचालन हुन लागेका हुन् । यसअघि गृह मन्त्रालयले २० पुसमा सबै जिल्ला प्रशासन कार्यालयहरुलाई पत्राचार गर्दै दर्ता विना र मापदण्ड विपरीत चलेका क्रसरहरु बन्द गर्न निर्देशन दिएको थियो ।
