रोशी– रोशी गाउँपालिकाको गाउँसभाको १९औँ अधिवेशनको दोस्रो बैठक सम्पन्न भएको छ । आज गाउँपालिका अध्यक्ष दिनेश लामाको सभाध्यक्षतामा गाउँसभाको १९औँ अधिवेशनको दोस्रो बैठक सम्पन्न भएको हो । बैठकले आगामी आर्थिक वर्ष २०८३÷८४ को नीति तथा कार्यक्रम र बजेट सर्वसम्मतिले पारित गरेको छ ।
असार १० गते बुधबारका दिनपहिलो बैठकमा गाउँपालिका अध्यक्ष दिनेश लामाले वार्षिक नीति तथा कार्यक्रम र उपाध्यक्ष मिमबहादुर वाइबा (ज्वाला) ले आय र व्ययको अनुमान (बजेट) प्रस्तुत गर्नुभएको थियो । उपाध्यक्ष मिमबहादुर वाइबा (ज्वाला) ले आगामी आर्थिक वर्ष २०८३÷८४ का लागि ७२ करोड ९९ लाख ४२ हजार रुपैयाँ बराबरको बजेट प्रस्तुत गर्नुभएको थियो ।
‘श्रवण कुमार पुरस्कार’ र जग्गादाताहरुलाई सम्मान।
गाउँपालिकाले आजै ‘श्रवण कुमार पुरस्कार’ प्रदान गरेको छ । बुबाआमा र अभिभावकहरूको उचित हेरचाह, स्याहारसुसार र पालनपोषण गर्ने छोरा, छोरी तथा बुहारीहरुलाई ‘श्रवण कुमार पुरस्कार’ प्रदान गरीएको हो । गाउँपालिकाका १२ वटै वडाबाट छनोट भएका उत्कृष्ट २४ जनालाई जनही पाँच हजार रुपैयाँ र सम्मान पत्र सहित सम्मान प्रदान गरिएको हो । गाउँपालिकाले २०७६ सालदेखि प्रत्येक बर्ष यो पुरस्कार प्रदान गरिँदै आएको छ ।
कार्यक्रमकै अवसरमा गाउँपालिकाले गाउँपालिकाको प्रशासकीय भवन निर्माणका लागि निःशुल्क जग्गा प्रदान गर्ने जग्गादाताहरुलाई सम्मान गरेको छ । गाउँपालिका अध्यक्ष दिनेश लामा, उपाध्यक्ष मिमबहादुर वाइबा र प्रमुख प्रशासकीय अधिकृत टंकबहादुर नेगीले दोसल्ला र सम्मानपत्रद्धारा सम्मान गरेका थिए ।
त्यस्तै चालु आर्थिक वर्षमा उत्कृष्ट कार्यसम्पादन गर्ने वडा नं ४, ६ र ९ को मेलमिलाप केन्द्रलाई सम्मान गरिएको थियो । त्यसैगरी गाउँपालिकामा कार्यरत रही अवकाश पाएका, बिभिन्न जिल्ला तथा स्थानीय तनहबाट सरुवा भएर आएका, अन्यत्र सरुवा भएका शिक्षकलाई बिदाई, तथा स्वागत गरीएको छ ।
