रोशी– २०८१ साल असोज दोस्रो साताकोे विनाशकारी बाढीबाट क्षतिग्रस्त रोशीका बिभिन्न ५ वटा झोलुङ्गे पुलहरु पुननिर्माण हुने भएको छ । २१ महिनापछि झोलुङ्गे पुल महाशाखाले रोशी गाउँपालिकाका पाँच वटा झोलुङ्गे पुल निर्माणका लागि बुधबार बोलपत्र (ठेक्का) आह्वान गरेको हो । निर्माण हुने पुलहरूमा कालढुङ्गा–ल्होङसाल, नार्के–तिनपिप्ले, कटुञ्जेबेँसी–रघुचौर, पिपल्टार–नक्कलेडाँडा तथा खाक्सी–सिहाले जोड्ने झोलुङ्गे पुल रहेका छन्। रोशी गाउँपालिकाका अध्यक्ष दिनेश लामाले जनप्रतिनिधिहरूको निरन्तर पहलपछि पुनर्निर्माण प्रक्रिया अघि बढेको बताउनुभयो ।
अन्ततः हाम्रो पहलको सुनुवाइ भएको र अब नागरिकको समस्या समाधान हुने विश्वास लिएको बताउनुहुदै अध्यक्ष लामाले रोशीबासीका तर्फबाट सम्बन्धित निकायलाई धन्यवाद व्यक्त गर्नुभयो । २०८१ असोज १०, ११ र १२ गतेको अविरल वर्षापछि आएको रोशी खोलाको बाढीले एउटा पक्की पुलसहित ६ वटा झोलुङ्गे पुल बगाएको थियो ।
