काभ्रे,रेडियो रोशी,
काभ्रे जिल्लाको मुख्य ब्यापारीक केन्द्र बनेपामा आजदेखि सुरु भएको ‘बृहत् काभ्रेपलाञ्चोक कृषि महोत्सव’ मा जनक मा.वि का बिद्यार्थीहरुले स्टल राखेका छन् । नमोबुद्ध–७ स्थित जनक मा.वि का बिद्यार्थीहरुले पढ्दै कमाउदै कार्यक्रमबाट उत्पादित अर्गानिक सामग्रीहरुको बिक्रिका लागि स्टल राखेका हुन् । नमोबुद्ध नगरपालिका र ४ नम्बर वडाको सहयोगमा जनक मा.वि का बिद्यार्थीहरुले स्टल राखेका हुन् । प्रति स्टल २० हजार रुपैयाँ मुल्य तोकिएको छ ।
बिद्यालयले सञ्चालन गरेको पढ्दै कमाउदै कार्यक्रम अन्तर्गत बिद्यार्थीहरुबाटै उत्पादित बिभिन्न प्रकारका गेडागुडि, अचार, बेमौसमी तरकारीहरु, अन्डा, मह, घ्यु लगायतका सामग्रीहरु राखिएको बिद्यालयका शिक्षक राजु काफ्ले (बयलघारी) ले जानकारी दिनुभयो । त्यसैगरी होटल म्यानेजमेन्ट बिधाका कक्षा ११ र १२ का बिद्यार्थीहरुले खाजाको स्टल राखेका छन् ।
आज दिउँसो राष्ट्रपति रामचन्द्र पौडेललले उद्घाटन गर्नुभएको महोत्सव फागुन ७ गतेसम्म सञ्चालन हुने छ । बनेपाको तीनदोबाटो देखि विद्यूत प्राधिकरणचोक सम्म स्टल सजाइएको छ । करिब २ सयको हाराहारीमा स्टल बुकिङ भएको बताईएको छ । महोत्सवमा जिल्लाभित्र उत्पादन भएका रैथाने उत्पादन तथा परिकारहरु, अन्नबाली, दलहन बाली, नगदेबाली, फलफुल बाली, तरकारी बाली, मसला बाली, च्याउ बाली, मौरी÷मह, नर्सरी तथा आलंकारिक विरुवाहरु, दुग्धजन्य उपज एवं उत्पादन प्रविधि, पंक्षीजन्य उपज एवं उत्पादन तथा प्रविधि, मासुजन्य उत्पादन र मत्स्यजन्य परिकारका स्टल रहनेछ ।
त्यसैगरी होमस्टे एवं लघु तथा साना उद्यमीहरुका स्टल, उत्पादन र प्रशोधनसँग सम्वन्धित उपकरणहरु, उच्च प्रविधियुक्त संरचनामा आधारित उत्पादन सामग्री, जैविक मल, प्राङ्गारिक मल र वित्तिय सेवा कर्जा सम्वन्धी स्टल रहनेछ ।
