चाडपर्व मनाउँदै गर्दा खानपानमा ध्यान दिन पोषणविद्को सुझाव

काभ्रे,

चाडपर्व मनाउँदै गर्दा खानपानमा पनि ध्यान दिन पोषणविद्ले सुझाव दिएका छन् । चाडपर्वको समयमा चिल्लो र गुलियो रोटीसँगै बजारमा पाइने विभिन्न प्रकारका मिठाईको उपभोग धेरै हुन्छ । चाडपर्वको बेला खानपिन अलि धेरै नै हुने हुनाले अरु बेलाको भन्दा बढी झोल पदार्थ र फलफूल, सलाद पनि खान पोषणविद्ले सुझाव दिएका छन् ।
बजारमा पाइने अनेकौँ किसिमका मिठाईमा मिसावट गरिएको तेल वा घ्युबाट बनाइएको हुने भएकाले स्वास्थ्यको ख्याल गरेर मात्र खान पोषणविद् कला नेपालको सुझाव छ । यस्ता मिठाईको प्रयोग सकेसम्म कम गर्न उहाँले आग्रह गर्नुभएको छ ।
उहाँका अनुसार शरीरको आवश्यकताका अनुसार मात्रा मिलाएर मात्र खानेकुरा खानुपर्छ । चाडपर्वमा शारीरिक सक्रियतामा कमी हुने र धेरै खाने भएकाले अपचको समस्या समेत बढ्न सक्छ । खानपानमा ध्यान नदिएको अवस्थामा शरीरको तौल बढ्ने, अपच हुने, कोलेस्ट्रोल बढ्ने समस्या हुन्छ । यस्तै, मधुमेहका बिरामीको सुगर लेभल बढ्ने, रक्तचापको समस्या बढ्ने लगायत समस्या आउन सक्ने पोषणविद् कला नेपालले बताउनुभयो ।