काभ्रे,
तेमाल गाउँपालिकाको सम्पुर्ण सामुदायिक विद्यालयहरु एक हप्ता बन्द गर्न आव्हान गरिएको छ । नेपाल विद्यालय कर्मचारी परिषद् तेमाल गाउँ समितिले गाउँपालिका भित्र रहेका सम्पुर्ण सामुदायिक बिद्यालयका प्रधानाध्यापकहरुलाई पत्र लेख्दै एक हप्ताको लागि बन्दको आव्हान गरेको हो । सरकारसँग विभिन्न माग राखी आन्दोलन गरिरहेको परिषद्ले सबै नेपाल विद्यालय कर्मचारी परिषदको मिति २०७९।०५।०६ गतेको राष्ट्रिय समितिको निर्णय पत्र बमोजिम विद्यालय कर्मचारीहरुको माग पुरा नभएसम्म आन्दोलनका कार्यक्रमहरुलाई निरन्तरता दिनका लागि बन्दको आव्हान गरिएको परिषद्का गाउँ समिति अध्यक्ष चमर सिं तामाङले जानकारी दिनुभयो ।
यसैबीच, एकीकृत अखिल नेपाल शिक्षक संगठन तेमाल गाउँपालिका कमिटिले पनि परिषद्को आन्दोलन प्रति एक्यबद्धता जाहेर गरेको छ । संगठनको गाउँ कमिटी अध्यक्ष सञ्जयकुमार लामाले एक प्रेस विज्ञप्ति जारी गर्दै परिषद्को माग जायज भएको जनाउँदै वार्ताबाट समस्या समाधान गर्न सरकारसँग माग गर्नुभएको छ ।
