काभ्रे,
६ महिनामा वैदेशिक रोजगारीका क्रममा झण्डै ५० करोड रुपैयाँ ठगी भएको छ । चालु आर्थिक वर्षको साउनदेखि पुस मसान्तसम्म अर्थात ६ महिनामा वैदेशिक रोजगारीमा झण्डै ५० करोड रुपैयाँ ठगी भएको दाबीसहितको उजुरी परेको बैदेशिक रोजगार विभागले जनाएको छ । ती उजुरीमध्ये ४३ प्रतिशतको फस्र्यौट हुँदा पीडितले करिब डेढ करोड रुपैयाँ मात्र फिर्ता पाएका छन् । उजुरी फस्र्यौटमा भएको ढिलाइका कारण पीडितलाई झन् पीडा थपिएको छ ।
वैदेशिक रोजगारीको नाममा ठगी गरेको दाबीसहित चालु आर्थिक वर्षको ६ महिनामा १ हजार ६ सय ७९ वटा उजुरी विभागमा दर्ता भएका छन् । जसमध्ये हालसम्म ७ सय ३६ वटा उजुरीको छिनोफानो भएको छ भने ९ सय ४३ उजुरीको सुनुवाइ हुन सकेको छैन । उजुरी गरेकामध्ये कतिपयसँग दाबी पुष्टि गर्ने कागजात नहुँदा समस्या भएको छ । विभागकाअनुसार ६० प्रतिशतभन्दा बढी उजुरीमा आफन्त, साथीभाइ वा चिनेजानेकै मानिसबाट ठगिमा परेको दाबी गरिएको छ । विश्वासमा परेर बिना आधार रकम बुझाउँदा ठगीमा पर्ने क्रम बढिरहेकाले सुरक्षित रुपमा र बिल भपाई लिएर मात्र रकम बुझाउन वैदेशिक रोजगार विभागले अनुरोध गर्दै आएको छ ।
