काभ्रे,
आज र भोलि बाग्मती, कोशी र गण्डकी प्रदेशका केही ठाउँमा ठूलो पानी पर्ने सम्भावना छ । अहिले पनि कास्की, लमजुङ, गोरखा, धादिङसहित देशका विभिन्न ठाउँमा हल्कादेखि मध्यम वर्षा भइरहेको छ । कर्णाली, बागमती र कोशी प्रदेशका पनि एक÷दुई ठाउँमा मेघ गर्जन÷चट्याङ्गसहित हल्कादेखि मध्यमसम्मको वर्षा भइरहेको छ । आज दिउँसो गण्डकीसहित कोशी, बागमती प्रदेशको केही ठाउँ तथा मधेश प्रदेशलगायत लुम्बिनी, कर्णाली र सुदूरपश्चिम प्रदेशको पहाडी र हिमाली भागका थोरै ठाउँमा मेघ गर्जन र चट्याङ्गसहित वर्षाको सम्भावना रहेको जल तथा मौसम पूर्वानुमान महाशाखाले जनाएको छ ।
मौसमविद्का अनुसार काठमाण्डौ उपत्यकासहित आसपासका जिल्लामा आज बेलुका र राति ठूलो पानी पर्ने सम्भावना छ । आज र भोलि बाग्मती, कोशी र गण्डकी प्रदेशका केही ठाउँमा ठूलो पानी पर्ने सम्भावना रहेको हुँदा आवश्यक सावधानी अपनाउन महाशाखाले आग्रह समेत गरेको छ । त्यस्तै ठूलो पानी पर्न सक्ने सम्भावना भएका क्षेत्रमा अबका तीन दिन रातको समयमा सकभर यात्रा नगर्न सल्लाह छ । आकस्मिक बाढी आउन सक्ने, पहाडी क्षेत्रमा पहिरोको जोखिम र बाटो अवरुद्ध हुन सक्नेजस्ता सम्भावना हुने भएकाले आवश्यक सावधानी अपनाउन भनिएको छ ।
