रोशी सहकर्मी–साउन २६,
२०७७,काभ्रे/

नमोवुद्ध नगरपालिकाका युवाहरुलाई रोजगारमुलक बनाउने उद्देश्यले होटल कुक तालिम सम्पन्न भएको छ । तालिमका सहभागीहरुलाई आज एक समारोहकाबीच सिटिइभिटीको व्यवसायिक तह १ को राष्ट्रिय सीप प्रमाणपत्र प्रदान गरिएको छ । शिक्षा मन्त्रालयअन्तर्गतको व्यवसायिक शिक्षा तथा तालिम अभिवृद्धि परियोजनाअन्तर्गत पुष्पा टेक्निकल इन्ष्टिच्युट बनेपाले उक्त तालिम प्रदान गरेको हो । ३ महिना लामो ३ सय ९० घण्टे उक्त तालिममा २७ जनाले व्यवसायिक तह १ को राष्ट्रिय सीप परिक्षण प्रमाणपत्र पाएका छन् । सहभागहरुलाई कार्यक्रमका प्रमुख अतिथि नमोबुद्ध नगरपालिकाका प्रमुख टिपी शर्मा तिमल्सिनाले प्रमाणपत्र प्रदान गर्नुभयो ।

कार्यक्रममा नगरप्रमुख तिमल्सिनाले तालिम लिएरमात्रै नहुने भन्दै यसलाई सदुपयोग गरेर रोजगारमुलक बन्नुपर्नेमा जोड दिनुभयो । तालिमका सहभागीहरुलाई अन्य माथिल्लोस्तरका प्रशिक्षण आवश्यक भएमा नगरपालिकाले समन्वय र सहयोग गर्ने तिमल्सिनाले बताउनुभयो ।

तालिमका सहागीहरुले रोजगारीमा पुग्नका लागि यो तालिमले सहयोग गरेको भन्दै खुशी व्यक्त गरेका छन् । उक्त तालिमका कतिपय सहभागीहरुले विभिन्न होटलहरुमा रोजगारी पाइरहेका छन् । सहभागीहरुलाई रोजगारीका लागि आफूहरुले पनि समन्वय गर्ने तालिम संयोजक अर्जुन सापकोटाले बताउनुभयो ।
तालिमका लागि सहभागी छनौट र आवश्यक समन्वय नमोबुद्ध नगरपालिकाले गरेको थियो भने आर्थिक सहयोग व्यवसायिक शिक्षा तथा तालिम अभिवृद्धि परियोजनाले गरेको थियो । सहभागीहरुलाई विजय घिमिरे, देवी तिमल्सिना, मन्जु शाह, भिन्नसिंह अधिकारीले प्रशिक्षण दिनुभएको थियो ।

तालिम संयोजक अर्र्नुन सापकोटाको सभापतित्व तथा नगरप्रमुख टिपी शर्मा तिमल्सिनाको प्रमुख आतिथ्यतामा भएको समापन कार्यक्रममा काभ्रे होटल एसोसिएसनका कोषाध्यक्ष दिपेश श्रेष्ठ, प्रशिक्षक विजय घिमिरे लगायतको पनि उपस्थिति रहेको थियो ।

Facebook Comments Box