काभ्रे,
बागमती प्रदेशका खानेपानी, उर्जा तथा सिंन्चाइ मन्त्री तिर्थ लामाले आफू संलग्न नभएको बिषयमा गलत प्रचार नगर्न अनुरोध गर्नुभएको छ । उँहाले एक प्रेस बिज्ञापति जारी गर्दै तथ्यहिन, कपोकल्पित समाचारको पछि नलाग्न अनुरोध गर्नुभएको हो । सुन जस्तो पहेंलो धातु काण्डमा संलग्नता रहेको भन्दै समाचारहरु सम्प्रेषण हुँदै आएको थियो । सो समाचार तथ्यहिन, कपोकल्पित र पूर्वाग्रही भएको मन्त्री लामाले बताउनुभएको छ । उँहाले सत्य, तथ्य र निश्पक्ष छानविनको लागि अनुरोध गर्दै दोषीलाई कडा कारवाहिको माग समेत गर्नुभएको छ ।
मन्त्री र नेपाली काङ्ग्रेस काभ्रेका सभापतिको हैसियतमा विभिन्न कार्यक्रममा खिचिएको फोटोलाइ प्रयोग गरेर भ्रम फैलाउन खोजेको उनको भनाइ छ । त्यसरी नै नेपाली काङ्ग्रेस काभ्रेले पनि बिज्ञप्ति निकालेको छ । सचिवद्वय गुणराज मुक्तान र मादव ढकालले सङ्युक्त बिज्ञप्ति जारी गर्दै गलत प्रचारप्रती भ्रममा नपर्न अनुरोध गरेका छन् ।
प्रेस बिज्ञप्ती जस्ताको तस्तै
मिति २०८० भाद्र २५ गते काठमाडौंमा सुन जस्तो पहेंलो धातुको डल्ला ९६० ग्राम ( नेपाल प्रहरीको मुचुल्का अनुसार) बरामद भएको घटनामा विगत दुई दिनदेखि मेरो समेत नाम जोडेर केहि अनलाईन सञ्चार माध्यमहरुमा प्रकाशित समाचारप्रति मेरो गम्भिर ध्यानाकर्षण भएको छ । यस्ता कपोलकल्पित, तथ्यहिन र पूर्वाग्रही समाचारले अत्यन्तै मर्माहत र दुखित तुल्याएको छ । त्यस्ता भ्रामक समाचारमा कुनै सत्यता नरहेको र मेरो कुनै प्रकारको संलग्नता नरहेको यसै विज्ञप्ति मार्फत आम जनसमुदायलाई आश्वस्त पार्न चाहन्छु ।
बाग्मती प्रदेश सरकारको मन्त्री र नेपाली कांग्रेस काभ्रेको सभापतिको हैसियतमा मेरो धेरै जनसम्पर्क हुने र ती समयमा वा अन्य कुनै प्रसंगमा कसैले खिचेका तस्विर समेत राखेर समाचार प्रकाशित गरिनु, सामाजिक सञ्जालमा अतिरञ्जित बनाउनु मेरो राजनीतिक र चारित्रिक हत्या गर्ने कुत्सित मनसाय बाहेक केही होइन । मलाई विवादमा ल्याउन चाहने निकृष्ट मानसिकता र दुराशयका साथ भएका यस्ता कार्यप्रति म सचेत छु ।
यस्ता घटनाको सत्यतथ्य छानविन होस् भन्ने पक्षमा म आफू दृढ रहेको जानकारी गराउदै दोषी पत्ता लगाउन र दोषीलाई कानुन बमोजिम कारवाहीको पनि माग गर्दछु । साथै घटनाको सत्यतथ्य छानविन गर्न आवश्यक अनुसन्धानमा सम्बन्धित निकायलाई सहयोगका लागि म प्रतिबद्ध छ । गलत सूचनाका आधारमा कसैको मानहानी हुने गरी समाचार सम्प्रेषण नगर्न, सामाजिक सञ्जालमा अतिरञ्जित नगर्न र लोकतन्त्रको आधारभूत सिद्धान्त अनुसार नागरिकलाई सत्य तथ्य सूचना मात्र प्रवाह गर्न सम्बद्ध सबैमा अनुरोध गर्दछु ।
