काभ्रे,
जिल्ला प्रशासन कार्यालय काभ्रेले आजबाट दशैंभर टिपर सञ्चालनमा रोक लगाएको छ । चाडपर्वको समयमा दुर्घटना बढेको भन्दै जिल्ला प्रशासन कार्यालय काभ्रेले टिपर सञ्चालनमा रोक लगाएको हो । घटस्थापनाकै दिन टिपरको ठक्करबाट एकजनाको ज्यान गएपछि जिल्ला प्रशासन कार्यालय काभ्रेले आज कार्तिक २ गते विहान ५ बजेदेखि कार्तिक १३ गते राती ९ बजेसम्म टिपर सञ्चालनमा रोक लगाउने निर्णय गरेको प्रमुख जिल्ला अधिकारी रुद्रादेवी शर्माले जानकारी दिनुभयो ।निर्माण सामग्रीको ढुवानीमा प्रयोग हुने टिपरका कारण चाडपर्वका बेला दुर्घटनाको जोखिम बढ्ने देखिएपछि प्रशासनले टिपर सञ्चालनमा रोक लगाएको हो। चाडपर्वको समयमा सवारीसाधनको बाक्लो आवतजावत हुने तथा ट्राफिक व्यवस्थापन गर्न जटिलता पैदा हुने भएकाले जिल्लाभित्र र जिल्लाभित्रको अरनिको राजमार्ग र वी.पी राजमार्गमा टिपर सञ्चालन गर्न रोक लगाउने निर्णय भएको हो ।
जिल्ला ट्राफिक प्रहरी कार्यालय काभ्रेका प्रमुख प्रहरी निरिक्षक जनार्दन घिमिरेका अनुसार, असोज महिनामा भएका २५ सवारी दुर्घटना मध्ये ६ दुर्घटनामा टिपर संलग्न छन् । ७ जनाको ज्यान गएकोमा ३ जनाले टिपरको कारण ज्यान गुमाएका छन् ।
