काभ्रे,रेडियो रोशी,
नमोबुद्ध नगरपालिका–४ स्थित जनक माध्यमिक विद्यालय र मण्डनदेउपुर नगरपालिका–९ स्थित डेडिथुम्का माध्यमिक विद्यालय बीच भगिनी सम्बन्ध स्थापना भएको छ । आज जनक माविको प्राङ्गणमा एक विशेष कार्यक्रमको आयोजना गरेर दुवै विद्यालयका व्यवस्थापन समिति, प्रधानाध्यापक शिक्षकहरू र बिद्यार्थीहरुको उपस्थितिमा भगिनी सम्बन्ध स्थापना गरिएको हो ।
दुवै विद्यालयले अपनाएका उत्कृष्ट शिक्षण विधि र सिकाइ प्रक्रियालाई एक–अर्कासँग साटासाट गर्ने, विद्यालयले गरेका असल अभ्यासहरु आदानप्रदान गर्ने तथा विद्यालयको चौतर्फी विकासमा सहकार्य गर्ने उद्देश्यका साथ दुई बिद्यालयबीच भगिनी सम्बन्ध स्थापना गरिएको हो ।
कार्यक्रममा पानसमा दीप प्रज्वलन गरी दुवै विद्यालयका बाल क्लबका अध्यक्ष र विद्यालय क्याप्टेनहरूले एक–अर्काको विद्यालयको झण्डा साटासाट गरेका थिए। डेडिथुम्का माविबाट प्रधानाध्यापक शिवकुमार पौडेलको नेतृत्वमा कक्षा ४ देखि १२ कक्षा सम्मका लगभग ६० जना विद्यार्थी र शिक्षकहरूको टोली जनक मावि आएका थिए ।
भ्रमणका क्रममा डेडिथुम्काको टोलीले जनक माविको भौतिक संरचना र त्यहाँ सञ्चालित उदाहरणीय परियोजनाहरूको अवलोकन गरेको थियो ।
अवलोकनका क्रममा जनक माविले गरिरहेका नवीन कार्यहरू विशेष आकर्षणको केन्द्र बनेका थिए । बिद्यालय नेपाल सरकारबाट नमुना बिद्यालय बिकासका लागि छनौट भईसकेको बताउनुहुदै नमुना बिद्यालयमा हुनुपर्ने सबै सुचकहरु पुरा हुनेगरि काम भैरहेको बिद्यालयका प्रअ प्रदिप पोखरेलले बताउनुभयो ।
विद्यालयमा नेपाल सरकारको पढ्दै कमाउदै कार्यक्रम अन्तर्गत बिभिन्न कार्यक्रमहरु सन्चालनमा रहेका छन्। जसअन्तर्गत बिद्यालयले ८ रोपनी जग्गा लिजमा लिएर खेती गरिरहेको छ।
विद्यार्थीहरूलाई उद्यमी बनाउन साढे २२ लाख रुपैयाँको ‘जनक उद्यम कोष’ स्थापना गरिएको छ। परियोजना प्रस्ताव पेस गर्ने इच्छुक विद्यार्थीले ५० हजार रुपैयाँसम्म २ प्रतिशत ब्याजमा ऋण पाउँछन्, जुन उद्यमको प्रकृति अनु्सार चुक्ता गर्नुपर्ने हुन्छ। हालसम्म ९ जना विद्यार्थीले यो सुविधा लिइसकेका छन् । ऋण लिएर उत्कृस्ट उद्यम गर्ने बिद्यार्थीलाई पुरस्कृत समेत गर्ने गरिएको छ । हाल विद्यालयमा १६ वटा गाई–भैँसी पालिएका छन् ।
पढ्दै कमाउदै कार्यक्रम अन्तर्गत बिद्याथीहरुलाई बाख्रा सापटि कार्यक्रम पनि सञ्चालनमा रहेको छ । जसमा बिद्यार्थीहरुलाई आजको दिनसम्म ३० वटा बाख्रा बितरण गरिएको छ । बितरण गरिएको बाख्राले जन्माएको पहिलो पाठापाठि बिद्यालयमा बुझाएपछि माउ बिद्यार्थीलाई नै दिईने बिद्यालयका प्रअ प्रदिप पोखरेलले बताउनुभयो । त्यस्तै आगामी वैशाखदेखि माछापालन सुरु गर्न पोखरी निर्माण भइसकेको छ। त्यसैगरि कुखुरापालन पनि गरिरहेको छ ।
विद्यालयमा नेपाल टेलिकमको सहयोगमा ई–लाइब्रेरी सञ्चालनमा छ। यस्तै, इजरायल सरकार र काठमाडौँ विश्वविद्यालय (केयु) को समन्वयमा ‘लघुना वाटर फिल्टर प्रोजेक्ट’ सञ्चालनको तयारी भइरहेको छ, जसले शौचालयको पानी फिल्टर गरी सिँचाइमा प्रयोग गर्ने बिद्यालयको तयारि छ ।
यो सम्बन्ध केवल कागजी सम्झौतामा मात्र सीमित नभई, सामुदायिक विद्यालयको चौतर्फि बिकास गर्न र गुणस्तरीय शिक्षा प्रदान गर्न कोसेढुङ्गा सावित हुने जनक माविका प्रधानाध्यापक प्रदिप पोखरेलले विश्वास व्यक्त गर्नुभयो । झण्डै ४०० विद्यार्थी रहेको डेडिथुम्का र ११५६ विद्यार्थी रहेको जनक माविले आफ्ना सफल अभ्यासहरू एक–आपसमा बाढ्ने प्रतिबद्धता जनाएका छन्।
कार्यक्रममा दुईटै बिद्यालय बिद्यार्थीहरुले सस्कृती झल्काउने गितहरुमा नृत्य प्रस्थुथ गरेका थिए । कार्यक्रममा नमोबुद्द ४ का वडा सदस्य सुरेन्द्र चिमौरिया, दुईटै बिद्यालयमा प्रअ, शिक्षक शिक्षिकाहरु, बिद्यार्थीहरु, पत्रकार लगायतको सहभागिता रहेको थियो ।
