काभ्रे,
रोशी गाउँपालिका वडा नं.३ साझाकोटमा अवस्थित भिमसेन प्राथमिक विद्यालयको नवनिर्मित तीन कोठे पक्की भवन उद्घाटन भएको छ । हिजो (सोमबार) रोशी गाउँपालिका अध्यक्ष दिनेश लामा, उपाध्यक्ष मिमबहादुर वाईबा (ज्वाला) र हिमाली गाउँ संरक्षण नेपालका संस्थापक मिथाइल हुसेनले संयुक्त रूपमा उद्घाटन गरेका हुन । विद्यालयको तीन कोठे भवन हिमाली गाउँ संरक्षण नेपालको आर्थिक सहयोगमा निर्माण भएको हो । ३१ लाख ७७ हजार ३ सय १ रुपैयाँ लागतमा भवन निर्माण भएको थियो ।
भवन उद्घाटन गर्नुहुदै अध्यक्ष लामाले भवन निर्माणको लागि आर्थिक सहयोग गर्ने हिमाली गाउँ संरक्षण नेपाललाई धन्यवाद व्यक्त गर्नुभयोे । गुणस्तरीय शिक्षाको लागि सुबिधा सम्पन्न भवन, दक्ष जनशक्ति र चुस्त व्यवस्थापन हुनुपर्ने बताउनुहुदैै ती सबै भएपछि अब विद्यार्थीले गुणस्तरीय शिक्षा पाउनेमा आफू विश्वस्त भएको अध्यक्ष लामाले बताउनुभयो ।
त्यसैगरि रोशी गाउँपालिका उपाध्यक्ष मिमबहादुर वाईबा (ज्वाला) ले सुविधासम्पन्न भवन निर्माणपछि अब शैक्षिक गुणस्तरमा अझ सुधार हुने बिश्वास व्यक्त गर्नुभयोे ।
विद्यालय भवन उद्घाटन कार्यक्रममा हिमाली गाउँ संरक्षण नेपालका संस्थापक मिथाइल हुसेन, अध्यक्ष कान्छीमाया तामाङ, सल्लाहकार तथा रोशी–५ का वडाध्यक्ष निरध्वज तामाङ, वडाध्यक्ष धनजित लामा, रोशी गाउँपालिकाका शिक्षा शाखा प्रमुख ठाकुर दाहाल लगायतको उपस्थिति रहेको थियो ।
