काभ्रे,
काभ्रेपलाञ्चोक जिल्लाको मण्डनदेउपुर नगरपालिकाले ८० जना नयाँ उद्यमी सिर्जना गरेको छ । नगरपालिकाको आर्थिक तथा प्राविधिक सहयोगमा चलिरहेको गरिबी निवारणका लागि लघु उद्यम विकास कार्यक्रम मार्फत आर्थिक वर्ष २०७९÷८० मा यी उद्यमी सिर्जना गरिएको हो । नगरपालिकाका रोजगार संयोजक एवं लघु उद्यम विकास कार्यक्रमका फोकल पर्सन सुरज पौडेलका अनुसार विभिन्न सीप मुलक तालिम प्रदान गरेर ८० जना नयाँ उद्यमी सिर्जना गरिएको छ ।
यो कार्यक्रम अन्तर्गत सिलाई कटाई, गलैँचा बुनाई, ब्युटीसियन र मोटरसाइकल वर्कशपको एक÷एक महिनातालिम प्रदान गरिएको छ । त्यसैगरी बाख्रा पालन र तरकारी खेती सम्बन्धी ५÷५ दिनको तालिमसञ्चालन गरिएको थियो । ४० जनाका लागि एडभान्स सिलाई कटाई तालिमसमेत प्रदान गरिएको फोकल पर्सन पौडेलले बताउनुभयो ।
यो कार्यक्रम नगरपालिकाको वडा नम्बर ४, ५, ८ र १० मा सञ्चालन गरिएको थियो । यसरी नयाँ सिर्जना भएकाउद्यमीलाई नगरप्रमुख टोक बहादुर वाईबा र उपप्रमुख विष्णुमणि नेपालले प्रमाण पत्र र प्रविधि हस्तान्तरण गर्नुभएको छ ।
आज (बुधबार) एकैदिन तालिम सञ्चालन गरिएका सम्बन्धित क्षेत्रमै पुगेर प्रमाण पत्र र प्रविधि हस्तान्तरण गरिएको हो । वडा नम्बर ४ को बयरबोटमाप्रमाण पत्र तथा प्रविधि हस्तान्तरण गर्दै नगरप्रमुख वाईबाले सीप मुलक तालिम नगरबासीकै करबाट संकलित रकमले सञ्चालन गरिएको भन्दै ब्यवहारमा उतार्न आग्रह गर्नुभयो ।नगरप्रमुख वाईबाले एक महिनाको सिलाई तालिम पुरा गरेका ब्यक्तिका लागि थप २ महिनाको एडभान्स तालिम सञ्चालन गर्न नगरपालिकाले सहयोग गर्ने बताउनुभयो ।
‘तपाईले सिक्नु भएको सीपका लागि नगरबासीकै करबाट संकलन भएको रकम लगानी भएको छ । एक महिना प्रारम्भिक चरणको तालिम लिनुभएको छ । मेसिनमा तपाईको हात बसिसकेको छ । अहिलेसम्म जति सिक्नुभएको छ, त्यसलाई ब्यवहारमा लागु गर्नु होला । एडभान्स तालिमको ब्यवस्था नगरपालिकाले गर्छ । मेसिन खरिदमा नगरपालिकाले साझेदारी गर्नेछ । नगरपालिकाले अभिभावकीय भूमिका खेल्नेछ ।’ नगरप्रमुख वाईबाले भन्नुभयो ।
वडा नम्बर ५ का सिकाई कटाई तालिममा सहभागीलाई प्रमाण पत्र र प्रविधि हस्तान्तरण गर्दै उपप्रमुख विष्णुमणि नेपालले आफ्नै नगरपालिकाभित्र केही उद्यम गर्न चाहानेलाई नगरपालिकाले सहयोग गर्ने बताउनुभयो । यस्ता तालिम मार्फत नगरपालिकाले समाजमा पछि परेका वर्ग र समुदायलाई समेत उच्च प्राथमिकताका साथ समेट्दै आएको भन्दै उहाँले सीपले आत्मनिर्भर बनाउने बताउनुभयो ।
‘नगरपालिकाले सबै समुदायको प्रतिनिधित्व हुने गरी यो तालिममा समावेश गरेको छ । सीपले मानिसलाई आत्मनिर्भर बनाउन प्रेरित गर्छ । हातमा सीप भयो भने अप्ठ्यारो परिस्थितिमा पनि आफु र आफ्नो परिवारका लागि निकै सहयोग पुग्छ । केही गर्छौँ भन्नेका लागि नगरपालिका सदैव सहयोग गर्न तत्पर छ । सिकेको सीपलाई त्यत्तिकै खेर जान नदिनु होला ।’ उपप्रमुख नेपालले भन्नुभयो ।
सिलाई कटाई तालिममा सहभागि दुई जनाका लागि एउटाको दरले १८ थान मेसिन प्रदान गरिएको छ । ४ थान गलैचा बुन्ने मेसिन र एक सय लिटर क्षमताको १८ वटा पानी ट्यांकी वितरण गरिएको फोकल पर्सन पौडेलले बताउनुभयो ।
सिलाई कटाई, गलैँचा बुनाई र ब्युटीसियन तालिममा महिला मात्र सहभागि थिए । यो तालिममा नगरपालिकाभित्र बसोबास गर्ने सबै समुदायका महिलाहरुको सहभागिता रहेको थियो ।
