काभ्रे,
चिसोबाट जोगिन झोलिलो खानेकुरा प्रशस्त खान डाक्टरले सुझाव दिएका छन् । चिसोमा मौसमी फ्लुसँगै सामान्य रुघाखोकी र ज्वरोका समस्या लिएर अस्पताल पुग्नेको सङ्ख्या बढेको भन्दै डाक्टरले तातो झोलिलो खानेकुरा खान सुझाव दिएका हुन् ।
अहिले अस्पताल पुग्ने सय जना बिरामीमध्ये ३० जना बिरामीमा चिसोले हुने स्वास्थ्य समस्या देखिएको भन्दै प्राध्यापक डाक्टर दिनेशकुमार लम्सालले आफू अनि आफ्नो परिवारका सदस्यलाई जोगाउन न्यानो भएर बस्न सुझाव दिनुभयो । उहाँले यो समयमा दीर्घरोगी, वृद्धवृद्धा र बालबालिकालाई जोगाउन विशेष ध्यान दिनुपर्नेमा जोड दिनुभयो ।
यसैबिच,
देशभरको तापक्रममा कमि आएका कारण चिसो बढ्न सक्ने भन्दै सतर्कता अपनाउन जल तथा मौसम विज्ञान विभाग, मौसम पूर्वानुमान महाशाखाले अनुरोध गरेको छ । हाल नेपालमा पश्चिमी वायुको आंशिक प्रभाव रहेको महाशाखाले जनाएको छ ।
अहिले बिहान देशका पहाडी भूभागमा आंशिक बदली रही बाँकी भूभागमा मौसम सामान्यतया सफा छ । तराईका केही स्थानहरूमा हुस्सु र कुहिरो लागेको छ । आज दिउँसो कोशी, गण्डकी र कर्णाली प्रदेशका उच्च पहाडी तथा हिमाली भूभागका एकदुई स्थानमा हल्का हिमपातको सम्भावना रहेको महाशाखाले निकालेको सूचनामा भनिएको छ ।
राति कोशी, बागमती, गण्डकी र कर्णाली प्रदेशका उच्च पहाडी तथा हिमाली भूभागका एकदुई स्थानमा हल्का हिमपातको सम्भावना रहेको मौसमविद्ले बताएका छन् ।
