काभ्रे,
काभ्रे जिल्लाको मेथिनकोट अस्पताल सहित बागमती प्रदेशका १० अस्पतालको स्तरोन्नति गरिने भएको छ । बागमती प्रदेश सरकारले प्रदेश अन्तर्गतका १० अस्पतालको स्तरोन्नति गर्ने निर्णय गरेको छ । बागमती प्रदेशको मन्त्रिपरिषद् बैठकले उक्त निर्णय गरेको हो ।
हेटौँडा अस्पताल र भक्तपुर अस्पताललाई ३०० शय्या बनाउने निर्णय भएको छ । धादिङ अस्पताल, नुवाकोटको त्रिशूली अस्पताल, सिन्धुली अस्पताल, चितवनको रत्ननगर बकुलहर अस्पताललाई १०० शय्या बनाउने निर्णय गरिएको छ ।
त्यस्तै काभ्रेको मेथिनकोट अस्पताल, सिन्धुपाल्चोकको सिन्धुपाल्चोक अस्पताल, रामेछापको रामेछाप अस्पताल र दोलखाको पशुपति चौलागाई स्मृति अस्पताललाई ५० शय्या बनाउने निर्णय गरिएको हो । यस्तै बैठकले स्वास्थ्य मन्त्रालय अन्तर्गतका निकायहरूका लागि १ हजार ६६९ जना कर्मदारीको सङ्गठन संरचना समेत स्वीकृत गरेको छ ।
