काभ्रे,
रोशी गाउँपालिकामा आगलागीबाट घाइते वालवालिकाहरुको इप्रका मंगलटारको टोलिले उद्धार गरेका छन् । हिजो दिउँसो गाउँपालिकाको वडा नम्बर १० पाखाटोलको एक घरमा आगलागी भएको थियो । आगलागीमा परेर ९ वर्षीय समीक्षा रेग्मी मगर र ६ बर्षीय सक्षम रेग्मी मगर घाईते भएका हुन् । इप्रका मंगलटारका प्रमुख कृष्ण गिरीका अनुसार घाईते दिदीभाई हुन् ।
घाईते बालबालिकालाई उपचारका लागि अस्पताल पठाइएको छ । उनीहरुको किर्तिपुर स्थित वर्न अस्पतालमा उपचार भैरहेको छ । स्थानीय र प्रहरीको सहयोगमा आगो नियन्त्रणमा लिइएको थियो । साथै आगलागीबाट बच्न आफू तथा छिमेकी तथा स्थानियलाई समेत सतर्क गराउन इप्रका मंगलटारका प्रमुख कृष्ण गिरीले नागरिकहरुमा अनुरोध गर्नुभएको छ ।
आगलागीबाट बच्न निम्न उपायहरु अपनाउन इप्रका मंगलटारको अनुरोधः
– बालबालिकालाई आगोसँग खेल्न नदिनुहोस, सलाइ लाइटरजस्ता बस्तुहरु वालवालिकाले भेट्ने ठाउँमा नराख्नुहोस ।
– खेत, बारीहरुमा झ्यास पोल्दा पूर्ण रुपमा चनाखो हुनुहोस, पूर्ण रुपमा निभे ननिभेको एकिन गर्नुहोस।
– विद्युत उपकरणहरू प्रयोग गरेपछि बन्द गर्नुहोस् ।
– आगो, ग्यास चुलो प्रयोग गरेपछि सिलिन्डरको रेगुलेटर बन्द गर्न नबिर्सनुहोस ।
– खुला आगो नजिक इन्धनजन्य पदार्थ (जस्तै पेट्रोल, डिजेल, ग्यास) नराख्नुहोस ।
– बिजुलीको तार छिनेमा वा स्पार्क देखिएमा तुरुन्त यस कार्यालयमा वा प्राधिकरणमा खबर गर्नुहोस ।
– आगलागी भएमा नआत्तिकन तुरुन्त १०० वा इलाका प्रहरी कार्यालयमा सम्पर्क (९८५१२८५४००, ९८५१२८५४१०) मा सम्पर्क गर्नुहोस ।
– आफू सतर्क रहनुहोस, छिमेकी तथा स्थानियलाइ समेत सतर्क गराउनुहोस ।
– मानबीय भावले आपत्कालिन अवस्थामा आगलागी नियन्त्रण सामूहिक भावना देखाउनुहोस ।
