काभ्रे,
गृहमन्त्री सुधन गुरुङले बीपी राजमार्ग अन्तर्गत काभ्रेपलाञ्चोक जिल्लाकोे रोशी खोला क्षेत्रमा बाढिले पुर्याएको क्षति र सम्भावित जोखिमको स्थलगत निरीक्षण गर्नुभएको छ । वर्षायाममा रोशी खोलामा आउने बाढीका कारण स्थानीयवासीले बर्सेनि भोग्दै आएका समस्या र गुनासो बढेपछि गृहमन्त्री गुरुङसहितको टिमले आज रोशी खोला क्षेत्रको प्रत्यक्ष अवलोकन गरेको हो ।
गृहमन्त्री गुरुङलाई नमोबुद्ध नगरपालिका र रोशी गाउँपालिकाको संगमस्थल चौकीडाँडामा नमोबुद्धका नगर प्रमुख कुनसाङ लामा, रोशी गाउँपालिकाका अध्यक्ष दिनेस लामा, उपाध्यक्ष मिम बहादुर वाइबा, वडाअध्यक्षहरु लगायतले स्वागत गरेका थिए ।
निरीक्षणका क्रममा गृहमन्त्री गुरुङले बाढीबाट प्रभावित क्षेत्रको अवस्थाबारे जानकारी लिनुका साथै उच्च जोखिममा रहेका बस्ती तथा निर्माणाधिन भौतिक पूर्वाधारको वस्तुस्थितिबारे अध्ययन गर्नुभएको छ । बर्खा सुरु हुनुअघि नै सम्भावित विपद्को जोखिम न्यूनीकरणका लागि आवश्यक तयारी र सरकारी निकायबिचको समन्वयका विषयमा उहाँले चासो व्यक्त गर्नुभएको छ ।
गृहमन्त्री गुरुङले रोशी क्षेत्रमा अवैध रूपमा सञ्चालनमा रहेका सम्पूर्ण क्रसर उद्योग तत्काल बन्द गर्न निर्देशन दिनुभएको छ । गिट्टी र बालुवाको अनियन्त्रित उत्खननले गर्दा रोशी क्षेत्रमा बाढी र पहिरोको जोखिम बढेको भन्दै उहाँले गम्भीर चासो व्यक्त गर्नुभएको छ ।
