काभ्रे,रेडियो रोशी,
काभ्रेपलाञ्चोक जिल्लाको तेमाल गाउँपालिकाले आफ्नो मातहतका सबै विद्यालयहरू आइतबार पनि सञ्चालन गर्ने निर्णय गरेको छ। गाउँपालिकाले हिजो एक सूचना जारी गर्दै यस्तो जानकारी गराएको हो । गाउँपालिकाका प्रमुख प्रशासकीय अधिकृत योगेन्द्र राज गुरुङद्वारा हस्ताक्षरित सूचना अनुसार, स्थानीय परिवेश, भुगोल, अवस्था र अभिभावकहरूको परामर्शलाई मध्यनजर गर्दै यो निर्णय लिइएको हो। हप्तामा दुई दिन बिदा दिँदा पाठ्यक्रमले तोकेको शैक्षिक उपलब्धि हासिल गर्न कठिन हुने देखिएकाले आइतबारको बिदा कटौती गरी पठनपाठन सुचारु गर्न लागिएको सूचनामा उल्लेख छ।
गाउँपालिका राष्ट्रिय महासंघ र नेपाल नगरपालिका संघले विद्यालय सञ्चालनका सम्बन्धमा गत वैशाख ४ गते जारी गरेको सुझाव कार्यान्वयन गर्ने सन्दर्भमा तेमालले यो कदम चालेको हो। यस निर्णयसँगै अब गाउँपालिकाभित्रका सबै सामुदायिक विद्यालयहरूमा अन्य कार्यदिन झैँ आइतबार पनि नियमित कक्षा सञ्चालन हुनेछन्। पालिका भित्रका सम्पुर्ण सामुदायिक विद्यालयहरूलाई आइतबार पनि विद्यालय सञ्चालनको ब्यवस्था मिलाउनुहुन पालिकाले अनुरोध गरेको छ ।
