यश कुमार परियार–चैत्र १७,
२०७६,काभ्रे/
नमोबुद्ध नगरपालिकाले नगरवासिलाई लकडाउनको पालना गर्न निर्देशन दिएको छ । आज नगरप्रमुख टि.पि.शर्मा तिमल्सिना द्धारा हस्ताक्षरित सुचना जारी गर्दै नगरपालिकाले यस्तो निर्देशन दिएको हो । सरकारले लकडाउनको अवधि चैत्र २५ गते सम्म लम्ब्याएपछि नगरपालिका भित्र कोरोना भाईरस अर्थात कोभिड १९ भित्रन नदिन थप सुरक्षा अपनाईरहेको नगरपालिकाले जनाएको छ ।
यस महामारीको समयमा बजारमा कालोबजारी जम्माखोरी जस्ता कामहरु हुने भन्दै दैनिक रुपमा बजार अनुगमन भईरहेको पनि जारी विज्ञप्तिमा उल्लेख छ । साथै विदेश र अन्यत्रबाट आएका मानिसहरुको निगरानी पनि भईरहेको विज्ञप्तिमा भनिएको छ ।
नगरवासीलाई आवश्यक काम बाहेक घर बाहिर ननिस्कन, बिदेशबाट आएका व्यक्तिले नेपाल सरकारले तोकेको वा स्थानीय निकायले व्यवस्था गरेको क्वारेन्टाईनमा बसी आफ्नो स्वास्थ्य स्थितिबारे चनाखो रहन, नियमित सरसफाईमा ध्यान दिन, भिडभाड वा अन्य जमघटहुने कार्यक्रमहरु नगर्न, साथै संक्रमणको आशंका वा लक्षण देखा परेमा नजिकैको स्वास्थ्य संस्था, वडा कार्यलयमा सम्पर्क गर्न पनि नगरपालिकाले अनुरोध गरेको छ । अझै पनि यस महामारीको अन्त्य भईनसकेकाले नआत्ति उचित सावधानि अपनाउदै आफु पनि बच्न र अरुलाई पनि बचाउन अपिल गरेको छ ।
नगरमा १८ सैयाको क्वारेन्टाईन यस अघि वडा नं ४ मा रहेको जनक माध्यमिक विद्यालयमा स्थापना भईसकेको छ । नगरपालिकाले कोरोना भाईरसको रोकथामको निमित्त बजार क्षेत्रमा डिस्ईन्फेक्टेड स्प्रे छरीसकेको छ ।
