सांकेतिक तस्बिर

रोशी सहकर्मी बनेपा– कार्तिक ०५,
काभ्रेको बनेपा नगरपालिका वडा नं. १३ भैसेपाटीमा रहेको चक्रज्योति माध्यमिक विद्यालयको ९ रोपनी जग्गा प्लटिङ गर्दै बिक्री गरिएपछि मालपोत कार्यालयले रोक्का गरेको छ । २०२२ सालदेखि विद्यालयको नाममा रहेको जग्गा व्यक्तिले बिक्री गरेकोमा स्थानीय जनताले विरोध गरेपछि रोक्का भएको हो । विद्यालयको जग्गा स्थानीय वासु थापा र केशवबहादुर थापासँग मिली जग्गा व्यवसायी लक्ष्मी प्रसाईंले खरिद गरी प्लटिङ गर्नुभएको हो । चलनचल्तीको मूल्य अनुसार विद्यालयको नाममा रहेको उक्त जग्गा झण्डै २० करोड रुपैयाँको रहेको विद्यालयले जनाएको छ । विद्यालयको जग्गा प्लटिङ भएको जानकारी पाएलगतै प्रधानाध्यापक चन्द्रप्रभा शाक्यले मालपोत कार्यालय काभ्रेलाई पत्र पठाई जग्गा संरक्षण र दोहोरो स्रेस्ता कायम भएको हटाउन अनुरोध गर्नुभएको थियो । विद्यालयलाई दान गरेको जग्गामा दाताहरूले नै मुद्दा गरेपछि बागमती अञ्चल अदालतले २०३५ साल जेठ ८ गते विद्यालयको नाममा जग्गा दर्ता गरी पुर्जा बनाउन र कसैले कुनै प्रयोजनका लागि बिक्री वितरण गर्न नमिल्ने फैसला सुनाएको थियो ।
साँगा नासिकास्थान गाउँ पञ्चायत वडा नम्बर १ मा पर्ने कित्ता नम्बर १३३, १३४ र १२७ का कित्ता विद्यालयको नाममा कायम भई नाप–नक्सा भएको थियो। सोही आधारमा विद्यालयले २०३९ साल असोज १० गते पुर्जा बनाएको थियो । मालपोत कार्यालय काभ्रेले दोहोरो स्रेस्ता कायम राखेकै कारण २०५५ साल पुष २५ गते उग्रतारा जनागाल गाविस घर भएका शम्भुबहादुर थापाले उक्त जग्गा कित्ताकाट गर्नुभयो । थापाले भाइहरू केशव र वासुदेव थापालाई कित्ता नम्बर १ सय २७ बाट बकसपत्र गरी दिनुभयो । बकसगरी लिएको जग्गा केशवबहादुर थापाबाट २०७४ साल जेष्ठ ११ गते लक्ष्मी प्रसाईंले खरिद गर्नुभयो ।
२०७६ साल असार २३ गते वासु थापाले लक्ष्मी प्रसाईंकै टेम्पलट्री डेभलपर्स प्रा.लि काठमाडौं महानगरपालिका १ का नाममा खरिद गर्नुभयो । लक्ष्मी प्रसाईंले झण्डै २ सय रोपनी जग्गा प्लटिङ गर्नुभएको छ । सार्वजनिक र विद्यालयको जग्गासमेत प्लटिङ हुँदा स्थानीयले पटक–पटक रोकेका थिए । विद्यालयले पटक–पटक बोलाउँदा प्रसाईं छलफलमा नआएको विद्यालयले आफ्नो जग्गाको सीमांकन गर्न गाडेको सिमेन्टको पोल समेत प्लटिङका कारण भत्किएको विद्यालयले जनाएको छ । जग्गा प्लटिङ गर्दा संधियारको सहमति लिनुपर्नेमा त्यस्तो नभएको विद्यालय व्यवस्थापन समितिका अध्यक्ष हरिभक्त श्रेष्ठले बताउनुभयो । विद्यालय व्यवस्थापन समितिका अध्यक्ष हरिभक्त श्रेष्ठका अनुसार विद्यालय व्यवस्थापन समितिले विद्यालयको जमिनलाई समेत असर पर्नेगरी प्लटिङ रोक्न जग्गा व्यवसायी लक्ष्मी प्रसाईंलाई पटक पटक अनुरोध गर्दा पनि उहाँ आउनुभएन ।

Facebook Comments