काभ्रे,
काभ्रे जिल्लाको विकट क्षेत्रमा रहेको महाभारत गाउँपालिकामा सडक कालोपत्रेको काम शुरु भएको छ । पिन्थली–रजबास–चारकिल्ला–देवीटार सडक अन्तर्गत महाभारत गाउँपालिकाको तिनखुट्टे–देवीटार खण्डमा पिचको काम थालिएको हो । प्रिमिक्स विधिबाट पिचको काम धमाधम भैरहेको छ । पालिका अध्यक्ष जिम्बाका अनुसार ८ किलो, ७ सय मिटर सडक विस्तारको काम दुई वर्षअघि शुरु गरिएको थियो ।
‘गाउँपालिकाभित्र सडक कालोपत्रे थालिएको महाभारमा पहिलो हो । अहिले तिनखुट्टे–देवीटार खण्डमा पिचको काम थालेका छौँ ।’ अध्यक्ष जिम्बाले भन्नुभयो । देवीटार–घर्तीछाप–भोर्लेनी ९ किलो मिटर सडकको पनि ठेक्का भएको उँहाले जानकारी दिनुभयो । त्यस्तै अर्को पनि १७ किलो मिटर सडक पनि पिच सहितको ठेक्का सम्झौता भैसकेको छ ।
