२०७७,बैशाख १७,
सिन्धुपाल्चोक/

कोरोना भाइरसले बन्दाबन्दीमा रहेका कारण विगत एक महिनादेखि रोकिएको बालबालिकालाई दिइने नियमित खोप सिन्धुपाल्चोक जिल्लामा शुरु भएको छ । नियमितरूपमा दिइँदै आएको बिसीजी, डिपीटी, पोलियो, हेपाटाइटिस, रुवेला, दादुरालगायत खोप रोकिँदा बालबालिकामा अर्को समस्या देखापर्ने भएकाले नियमित गर्न स्वास्थ्य तथा जनसङ्ख्या मन्त्रालयको निर्देशनअनुसार खोप शुरु गरिएको जिल्ला जनस्वास्थ्य कार्यालयले जानकारी दिएको छ ।

कोभिड–१९ को सङ्क्रमणबाट जोगिन स्वास्थ्यकर्मीलाई मास्क र पञ्जा लगाइ सुरक्षित भएर खोप लगाउन आग्रह गरिएको वरिष्ठ जनस्वास्थ्य अधिकृत दुर्गादत्त चापागाईँले बताउनुभयो । तीन नगरपालिकासहित १२ स्थानीय निकाय रहेको जिल्लाका सबै १०३ वडामा खोप शुरु गरिएको छ । यसबाट दुई वर्षमुनिका छ हजार बढी बालबालिकाले स्वास्थ्य सुविधा प्राप्त गर्ने जिल्ला जनस्वास्थ्य कार्यालयले जनाएको छ ।

यसैबीच चौतारास्थित जिल्ला समन्वय समितिको भवनमा निर्माण गरिएको आइसोलेसनमा राखिएका दुई महिला र दुई बालिकासहित चार जनाको स्वाब परीक्षण गर्दा नेगेटिभ रिपोर्ट आएको आएको छ । ज्वरो आउने, टाउको दुख्ने, रुघाखोकी लागेपछि कोरोना भाइरस सङ्क्रमणको आशङ्कामा क्वारेन्टाइनबाट आइसोलेसनमा राखिएको थियो । उनीहरु सबैको स्वाब परीक्षणका लागि टेकुस्थित राष्ट्रिय जनस्वास्थ्य प्रयोगशालामा पठाइएकामा सबैको रिपोर्ट नेगेटिभ भएकाले उनीहरुलार्ई आजै घर पठाइने वरिष्ठ जनस्वास्थ्य अधिकृत चापागाईंँले बताउनुभयो ।

एम्बुलेन्समार्फत प्रदेश नं २ को सिरहाबाट चौतारा साँगाचोकगढी नगरपालिका–१ स्याउले माइत आएकी आमाछोरी र उनको सङ्सर्गमा आएकी एक महिला र बालिकासमेतलाई शुरुमा क्वारेन्टाइनमा र पछि आइसोलेसनमा राखिएको थियो । यसअघि जिल्लामा आठ जनालाई आइसोलेसनमा राखिएकामा सबैको रिपोर्ट नेगेटिभ आएपछि उनीहरुलाई घर पठाइसकिएको छ । हाल ४७ जनालाई क्वारेन्टाइनमा राखिएको बताइएको छ ।

गोरखापत्रबाट

Facebook Comments