काभ्रे,
इजरायलमा रहेका नेपाली विद्यार्थीहरुले आफुहरु तत्काल नेपाल फर्कन चाहे पनि सरकारले ढिलासुस्ती गरेको बताएका छन् । सँगै रहेका कम्बोडिया र थाईल्याण्डका नागरिक घर फर्किसके पनि नेपालीहरुलाई स्वदेश फर्काउन सरकारले ढिलाई गरिरहेको विद्यार्थीहरुको गुनासो छ । सामाजिक सञ्जाल मार्फत नेपाल फर्किने प्रतिक्षामा रहेका विद्यार्थीहरुले सरकारले जहाज पठाउन सक्ने कि नसक्ने भन्दै प्रश्न गरेका छन् । तर सरकारले भने इजरायलमा रहेका नेपालीहरुलाई उद्धार गर्न चाहे पनि त्यहाँको रक्षा मन्त्रालय अन्तर्गत रहेको राष्ट्रिय सुरक्षा प्रणालीले अनुमति नदिँदासम्म ल्याउन नसक्ने भएको छ । अत्याधिक संकटग्रस्त भएको र अहिले पनि युद्ध चलिरहेकाले त्यहाँ रहेका नेपालीलाई उद्धार गर्न सरकारले चाहँदा पनि नसक्ने भएको हो ।
परराष्ट्र मन्त्रालयको आग्रहमा पर्यटन मन्त्रालयले नेपाल वायू सेवा निगमलाई चार्टड उडानका लागि तयारी अवस्था रहन हिजो पत्रचार गरेको छ । यद्यपि इजरायल सरकारले ‘लेवल वान वार्निङ’ जारी गरेकाले त्यस्तो अवस्थामा कमर्सियल फ्लाइट गर्ने अनुमति हुँदैन । उडान सञ्चालन गर्नका निम्ति विशेष अनुमति (स्पेशल परमिट) लिनुपर्ने हुन्छ । जुन अहिलेको अवस्थामा त्यहाँको नागरिक उड्ड्यन प्राधिकरणले सिधै अनुमति दिन नसक्दा अहिलेसम्म नेपालले चार्टड उडान गर्न सकेको छैन । त्यहाँको प्राधिकरणले ‘नेशनल डिफेन्स म्याकानिज्म’ को अनुमति लिएर मात्रै उडान अनुमति दिने भएकाले अहिलेसम्म नेपाल सरकारलाई उडानका लागि अनुमति प्राप्त नभएको बताईएको छ ।
