काभ्रे,
वैदेशिक रोजगारीको क्रममा अलपत्र परेका तेमालका छोईगु तामाङको उद्दार गरीएको छ । वैदेशिक रोजगारीको क्रममा नेपालबाट करिव १८ महिना अघि मलेसिया पुगेका तेमाल– ८ निवासी तामाङ मलेसियामा अलपत्र परेका थिए । राष्ट्रिय स्वतन्त्र पार्टी प्रवास विभाग मलेसियाको अगुवाईमा उनलाई उद्दार गरी स्वदेश फर्काईएको हो ।
स्वास्थ्य अवस्था खराब रहेका तामाङ नेपाल फर्किन आवश्यक पर्ने सम्पुर्ण कानुनी , कागजी प्रक्रिया पूरा गरिसकेपश्चात् यहीँ मिति सन् २०२३ नोभेम्बर २० तारिख सोमबार बिहान ०३ः४५ बजे हिमालयन एयरलाइन्सको क्वालालम्पुर – काठमाडौं हवाई उडानमार्फत स्वदेश फर्काइएको हो । पुगेको तीन महिनासम्म पनि कम्पनीले तलब नदिएपछि कम्पनी परिवर्तन गरेर छोईगु अवैधानिक रुपमा मलेसियामै बसिरहेका थिए । अवैधानिक रहेका तामाङ अचनाक बिरामी परेपछि कम्पनीले उपचार गर्न आनाकानी गरेपछि उनले सामाजिक संजाल फेसबुकमा आफु बिरामी भएको र सहयोगको खाँचो रहेको जनाउँदै उद्दार गरि नेपाल फर्काउन सार्वजनिक अपिल गरेका थिए ।
आर्थिक र स्वास्थ्य दुबै नाजुक अवस्थामा रहेका छोईगुलाई रोशी गाउँपालिका वडा नम्बर ६ घर भै लामो समयदेखि मलेसियामा रहनुभएका मिलन ठकुरी नेतृत्वमा उद्धार गरिएको हो । राष्ट्रिय स्वतन्त्र पार्टी मलेसियाका उपसभापति समेत रहनुभएका ठाकुरीको विशेष पहलकदमीमा छोईगुलाई नेपाल पठाइएको हो ।
मलेसिया स्थित नेपाली दूतावास, एनआरएन मलेसिया, राष्ट्रिय स्वतन्त्र पार्टी मलेसिया विभाग प्रमुख नेत्र केसी, पासाङ लामा, राज लामा, प्रकाश गिरी, उमेश प्रसाई, पूर्ण सुब्बा योङहाङ लगायतले विशेष सहयोगमा तामाङलाई नेपाल पठाउन सहयोग पुगेको उँहाले बताउनुभयो ।
