काभ्रे,
काभ्रे जिल्लाको बनेपामा एकै दिन विभिन्न विद्याका ४७ वटा पसल अनुगमन गरिएको छ । सहायक प्रमुख जिल्ला अधिकारी अमरदिप सुनुवारको सयोजकत्वमा बनेपामा रहेका खाद्य, होटल, औषधी पसल, अस्पताल, रेस्टुरेन्ट, एग्रोभेट लगायतका ४७ वटा पसलहरु अनुगमन गरिएको हो । अनुगमनका क्रममा बनेपाको भोमी अस्पताल, सत्यसाई, आरोध्या फार्मेसी, स्माईल केयर, अन टाईम मेडि मार्ट र बनेपा अस्पतालमा पुगेको टोलीले म्याद सकिएको औषधीका साथै स्वास्थ्य संस्थाले पुरा गर्नु पर्ने मापदण्ड पुरा नगरेको फेला पारेको सहायक प्रमुख जिल्ला अधिकारी अमरदिप सुनुवारले बताउनुभयो । बनेपामा बजार अनुगमनका क्रममा स्वास्थ्य संस्थाहरुले पार्किङ्ग उपलब्ध नगराएको, अस्पतालबाट निस्कने फोहोर ब्यवस्थापनमा ध्यान नदिएको भन्दै तत्काल सुधार गर्न निर्देशन दिएको छ ।
अनुगमनका क्रममा सहायक प्रमुख जिल्ला अधिकारी अमरदिप सुनुवार, बनेपा नगरपालिका उपप्रमुख विमला सापकोटा, प्रादेशिक ल्यावका प्रमुख नारायण कार्की, स्वास्थ्य कार्यालय काभ्रेका प्रमुख डा. पुरुषोतम सेढाई, घरेलु तथा साना उद्योग कार्यालय काभ्रेका निमित्त मदन बजगाई, खाद्य प्रविधि गुण नियन्त्रण कार्यालयका प्रमुख, जिल्ला प्रहरी कार्यालयका डिएस्पी ढुण्डीराज न्यौपाने, ईलाका प्रहरी कार्यालय बनेपाका डिएस्पी रेशम बोहरा, ट्राफिक प्रहरी कार्यालयका प्रहरी निरिक्षक राजेश सिलवाल, उद्योग बाणिज्य संघ, उपभोक्ताहरु, नागरिक समाज लगायतको सहभागिता रहेको थियो ।
