काभ्रे,
आगामी माघ ११ गते हुँने निर्वाचन राष्ट्रिय सभा निर्वाचनका लागि ५२ जनाले मनोनयन दर्ता गराएका छन् । रिक्त रहेका १९ पदका लागि आज ५२ जनाले मनोनयन दर्ता गराएका हुन् । निर्वाचन आयोगका अनुसार सातै प्रदेशको केन्द्रमा स्थापना गरिएका निर्वाचन अधिकृतको कार्यालयमा उमेदवारको मनोनयनपत्र दर्ता भएको हो ।
निर्वाचनका लागि गठबन्धन दलहरू, नेकपा (एमाले) लगायतका अन्य दलहरूले छुट्टाछुट्टै उमेदवारी दर्ता गराएका छन् । राष्ट्रियसभा निर्वाचनमा प्रदेशसभा स दस्य र गाउँपालिका अध्यक्ष र उपाध्यक्ष तथा नगरपालिका प्रमुख र उपप्रमुख मतदाता रहने व्यवस्था छ । जसअनुसार ५ सय ४९ प्रदेशसभा सदस्यसहित पालिका प्रमुख र उपप्रमुख गरी जम्मा दुई हजार ४७ जनाको मतदाता नामावलीमा नाम स्वीकृत भएको छ । निर्वाचन तालिकाअनुसार आज दर्ता भएको उमेदवारीमाथि पुस २४ गते दाबीविरोध र उजुरी दिन सकिनेछ ।
त्यसमा २५ र २६ गते जाँचबुझ गरी उमेदवारीको नामावली प्रकाशन हुनेछ भने २७ गते नाम फिर्ता लिन चाहने उम्मेदवारको नाम फिर्ता र उमेदवारको अन्तिम नामावली प्रकाशन हुने निर्वाचन आयोगले जनाएको छ । त्यस्तै, पुस २८ गते उमेदवारलाई निर्वाचन चिह्न प्रदान गरिने कार्यतालिका रहेको आयोगका प्रवक्ता शालिग्राम शर्मा पौडेलले बताउनुभयो ।
