काभ्रे,
आराध्यदेव भगवान शिवको विधिपूर्वक पूजाआराधना गरी आज देशभर महाशिवरात्री पर्व मनाइँदैछ । आजको दिन वैदिक सनातन हिन्दू धर्मावलम्बीले बिहानैदेखि नदी, कुण्ड र तलाउमा स्नान गरी शिवालयमा गई श्रद्धाभक्तिपूर्वक पूजाआराधना गर्दछन् । यस पर्वलाई दीनदुःखी र कष्टपूर्ण अवस्थामा रहेका प्राणीको हृदयमा धर्मको उदय गराउने आशुतोष भगवान शिवको अति प्यारो दिनका रूपमा पनि व्याख्या गरिन्छ । पशुपतिनाथको मन्दिरमा बिहानैदेखि दर्शनार्थीको भीड लागेको छ । आज पशुपतिनाथमा रातको चार प्रहरमा चार प्रकारका पूजाका अतिरिक्त महादीप, अखण्डदीप, लक्ष्यबत्ती तथा दीपोत्सवका साथै लाख बेलपत्र अर्पण गरिन्छ । कैलाशकुट र किराँतेश्वरका सङ्गीत आश्रममा शास्त्रीय नाचगान गरिन्छ । यस वर्ष महाशिवरात्रिका अवसरमा पशुपतिमा दर्शनका लागि तीन वटा लाइनको व्यवस्था गरिएको पशुपति क्षेत्र विकास कोषले जनाएको छ ।
नेपाली सेनाले आज सेना दिवस मनाउँदै
नेपाली सेनाले आफ्नो स्थापनाको २ सय ६१ औँ वार्षिकोत्सवका अवसरमा आज सेना दिवस मनाउँदैछ । दिवसको अवसरमा सैनिक कला, सांस्कृतिक एवं साङ्गीतिक प्रस्तुतिको आयोजना गरिएको सैनिक जनसम्पर्क निर्देशनालयले जनाएको छ । राष्ट्रपति रामचन्द्र पौडेल महाशिवरात्री तथा सेना दिवसका अवसरमा नेपाली सेनाले सैनिक मञ्च टुँडिखेलमा आयोजना हुने विशेष समारोहमा सहभागी हुनुहुने भएको छ । महाशिवरात्रिको दिनलाई सेना दिवसका रूपमा मनाउँदै आएको सेनाले सैनिक मञ्चमा परेड तथा तोप बढाइँ, कवाजलगायत विविध सांस्कृतिक कार्यक्रम सञ्चालन गर्दै आएको छ ।
