काभ्रे,
काभ्रे जिल्लामा बाबु, छोरी र छोरा एकै पटक एसईई परीक्षा २०८० मा सामेल भएका छन् । जिल्लाको पाँचखाल नगरपालिका वडा नम्वर १ मा रहेको ज्ञानेश्वरी माध्यमिक विद्यालयका कार्यालय सहयोगी मणिराज दाहाल सहित उँहाको छोरी मनिषा र छोरा मनिष दाहाल एसईई परीक्षा २०८० मा सामेल भएका हुन् । बाबु मणिराज र छोरा मनिषले ज्ञानेश्वरी माध्यमिक विद्यालयमा अध्ययन गरेका हुन् भने छोरी मनिषाले पाँचखालमा रहेको सरस्वती शिक्षा गृहमा अध्ययन गरेकी हुन् ।
छोरा मनिष ज्ञानेश्वरी माध्यमिक विद्यालयमा भर्ना भए पछि बाबु समेत रहनुभएका कार्यालय सहयोगी मणिराजले आफुलाई पनि अध्ययन गर्न र एसईई परीक्षा पास गर्ने चाहना भएको बताए पछि विद्यालय परिवारले उँहालाई अध्ययनको वातावरण मिलाएको विद्यालयका सहायक प्रधानाध्यापक गंगाराम कँडेलले बताउनुभयो । ४१ वर्षको उमेरमा पहिलो पटक एसईई परीक्षामा सामेल हुने अवसर पाएकोमा बाबु मणिराज दाहाल निकै खुसि देखिनुभएको छ । बाबु छोराको परीक्षा केन्द्र सर्वमंगला मावी रहेको छ भने छोरी मनिषाको केन्द्र दुधेश्वर मावीमा रहेको छ ।
