काभ्रे,
नमोबुद्ध नगरपालिकाकामा बाल सञ्जालका पदाधिकारीलाई १ दिने क्षमता विकास सम्बन्धी अभिमुखीकरण गराईएको छ । हिजो (शुक्रबार) मानवअधिकारकर्मी भोजराज तिमल्सिनाले सञ्जालका पदाधिकारीलाई बालअधिकार र कर्तव्य, बालमैत्री स्थानीय शासन, बाल संरक्षण, सहभागिता र क्षमता विकासका विषयमा क्षमता विकास सम्बन्धी अभिमुखीकरण गराउनुभएको हो ।
कार्यक्रमलाई सम्बोधन गर्दै नगरप्रमुख कुनसाङ लामाले बालमैत्री नगर बनाउनका लागि आवश्यक सबै काम गरिरहेको बताउनुभयो । उँहाले केही वडा बालमैत्री घोषणाका लागि तयार भइ सकेपनि वाँकी वडा बालमैत्रीका सूचकहरू पुरा गर्न लागि परेको बताउनुभयो । त्यसैगरी नगर प्रवक्ता समेत रहनुभएका ६ वडा नम्बर वडाका वडाध्यक्ष टिकाबहादुर केसीले बालक्लवहरूलाई समस्या र सहयोगका लागि आ–आफ्नो वडामा सम्पर्क गर्न सकिने बताउनुभयो । महिला तथा बालवालिका शाखा प्रमुख तारादेवी सुनुुवारले बालमैत्री नगर घोषणाका लागि हालसम्म भएगरेका कामहरूका विषयमा भनाई राख्नुभएको थियो ।
नमोबुद्ध नगरपालिकाका नगर बालसञ्जाल संयोजक निरज अधिकारीको संयोजनमा भएको कार्यक्रममा नगर, वडा र विद्यालयस्तका बाल समूहका वालिकासहित ३२ जनाको सहभागिता थियो ।
