काभ्रे,
रोशी गाउँपालिका वडा नं–२ गुम्बागाङ पुरानोगाउँमा नवनिर्मित डम्फूपार्कको उद्घाटन भएको छ । बागमती प्रदेशको भाषा दिवसको अवसर पारेर हिजो (बिहीवार) रोशी गाउँपालिकाका अध्यक्ष दिनेश लामा र उपाध्यक्ष मिमबहादुर वाईबा (ज्वाला)ले संयुक्त रुपमा पार्कको उद्घाटन गरेका हुन् । गाउँपालिकाको १० लाख आर्थिक सहयोगमा सम्पदा संरक्षण तथा पर्यटन प्रवर्धन समितीले तामाङ समुदायको साङ्स्कृतिक पहिचान डम्फूसहितको पार्क निर्माण गरेको थियो ।
उद्घाटन कार्यक्रमलाई सम्बोधन गर्नुहुदै प्रमुख अतिथि तथा गाउँपालिका अध्यक्ष दिनेश लामाले स्थानीय संस्कृती र परम्परालाई संरक्षण, सम्बद्र्धन र निरन्तरता दिने काम स्थानीय सरकारको अधिकार क्षेत्र र कर्तव्य भित्र पर्ने र त्यो काम रोशी गाउँपालिकाले गर्दै आएको बताउनुभयो । नवनिर्मित डम्फू पार्कले यो ठाउँको महत्व र पहिचान बढाउछ भन्ने कुरामा आफु विश्वस्त रहेको बताउनुभयो । रोशीको पर्यटकीय क्षेत्र तिनधारे झरनामा आउने पर्यटकलाई पार्कसम्म तान्ने वातावरण निर्माण गर्नु तिर लाग्नुपर्ने बताउनुहुदै उहाँले डम्फू पार्कलाई पूर्णता दिन गाउँपालिकाले आगामी दिनमा पनि सहयोग गर्ने प्रतिबद्धता व्यक्त गर्नुभयो ।
त्यसैगरि गाउँपालिका उपाध्यक्ष मिमबहादुर वाईबा (ज्वाला)ले पालिका भित्र रहेका विभिन्न समुदायको भाषा, धर्म, संस्कार, संस्कृतिलाई समान रूपमा महत्व दिदै संरक्षण र प्रवर्धन गर्दै आएको बताउनुभयो। कार्यक्रममा तामाङ दोहरी कलाकारहरूले तामाङ समुदायको संस्कृती झल्कने गित प्रस्तुत गरेका थिए।
सोही कार्यक्रममा जग्गादाता रामबहादुर लामालाई सम्मानपत्रले सम्मान गरिएको थियो । लामाले डम्फू पार्क निर्माणको लागि करिब एक रोपनी जग्गा उपलब्ध गरेका थिए । त्यसरी नै अन्य सहयोगीहरूलाई पनि सम्मान गरिएको थियो ।
सम्पदा संरक्षण तथा पर्यटन प्रवर्धन समितीका अध्यक्ष शंखजीत लामाको सभाध्यक्षतामा भएको कार्यक्रममा वडाध्यक्ष हस्तमान लामा, पूर्ववडाध्यक्ष पोते लामा स्थानीय तथा समाजसेवी सार्कीमान लामा, समाजसेवी चन्द्रबहादुर लामा, स्थानियहरु लगायत को सहभागिता रहेको थियो ।
