काभ्रे,
आज १३ औँ विश्व रेडियो दिवस विभिन्न कार्यक्रम गरी मनाइँदैछ । ‘रेडियो सूचना शिक्षा र मनोरञ्जनको एक शताब्दी’ भन्ने नाराका साथ नेपाललगायत विश्वभर विभिन्न कार्यक्रम गरी मनाइँदैछ । सामुदायिक रेडियो प्रसारक सङ्घ (अकोराब) को आयोजनामा आज ललितपुरमा विशेष कार्यक्रम हुँदैछ । विश्वमा रेडियो प्रसारणको १ सय वर्ष र नेपालमा स्वतन्त्र रेडियो प्रसारणको २५ वर्ष पूरा भएको छ ।
विश्व रेडियो दिवसको अवसरमा शुभकामना दिँदै सरकारका प्रवक्ता, सञ्चार तथासूचना प्रविधि मन्त्री रेखा शर्माले विगतका अफ्ठेरा चिर्दै जनताको सबैभन्दा भरपर्दो सञ्चारमाध्यमको रूपमा रेडियोलाई विकास गर्न सरकारले सक्दो सहयोग गर्ने प्रतिबद्धता जनाउनुभयो । अकोराबका अध्यक्ष अर्जुन गिरीले नेपालका रेडियोको भूमिका समाज रुपान्तरणमा सकारात्मक रहेको उल्लेख गर्दै सामुदायिक रेडियोको भूमिका अझ प्रभावकारी बनाउने बारेमा आज छलफल हुन लागेको बताउनुभयो । सामुदायिक रेडियोको पहिचानका लागि सरकारले नीतिगत रूपमा व्यवस्था गर्नुपर्ने माग अझैँ सम्वोधन नभएको बताउनुभयो ।
