काभ्रे,
बोक्सीको आरोप लगाई कुटपिट पश्चात हत्या गरी फरार रहेका रोशी गाउँपालिकाका २ जना १५ वर्षपछि पक्राउ परेका छन् । १५ वर्ष अघि काभ्रे जिल्लाको तत्कालीन शिखर आम्बोटे गा.बि.स. हालको रोशि गाउँपालिका वडा नम्बर ३ मा भएको घटनामा संलग्न दुईजना पक्राउ परेका हुन् । २०६५ असोज २९ गते काभ्रेको साविक शिखर आम्बोटे गाउँ विकास समितिका चमारसिंह मगर भन्ने जनकबहादुर मगरलाई कुटपिट गरी हत्या गरेपछि फरार रहेका स्थानीय टङ्कबहादुर मगर र सन्तबहादुर मगरलाई पक्राउ गरेको काठमाण्डौ उपत्यका अपराध अनुसन्धान कार्यालयका प्रहरी उपरीक्षक मिलन केसीले जानकारी दिनुभयो ।
अदालतबाट दोषी ठहर भइसकेका उनीहरू फरार रहेका थिए । उनीहरूलाई गएको पुस २४ गते पक्राउ गरेकोमा सन्तलाई कारबाहीका लागि जिल्ला अदालत काठमाण्डौमा बुझाइसकेको र टङ्कको स्वास्थ्यमा समस्या आएका कारण उपचारपछि आज अदालतमा बुझाएको प्रहरी उपरीक्षक मिलन केसीले जानकारी दिनुभयो ।
