काभ्रे,
बागमती प्रदेश सरकारका भौतिक पूर्वाधार मन्त्री युवराज दुलालले बिपी राजमार्गबाट महाभारत र खानीखोला गाउँपालिका हुँदै मकवानपुर स्थित मदनभण्डारी लोक मार्ग जोड्ने गरी जनमुक्ति मार्ग निर्माण गर्ने प्रतिबद्धता ब्यक्त गर्नुभएको छ । संघ, प्रदेश र गाउँपालिकाको विभिन्न आायेजनाहरुको अनुगमन गर्न र सार्वजनिक सुनुवाई कार्यक्रममा सहभागी हुन महाभारत गाउँपालिका पुग्नुभएको मन्त्री दुलालले यस्तो उद्घोष गर्नुभएको हो । मन्त्री दुलालले महाभारत गाउँपालिका महादेवटार तीनखुट्टेदेखि गाउँपालिका केन्द्रसम्म पुग्ने सडक कालोपत्रे र अन्य सडक अनुगमन गर्नुभएको छ ।
सो आयोजनाको लागि आगामी आर्थिक वर्षबाट नै काम सुरु गर्ने गरी २ अर्ब रुपैयाँ बराबरको स्रोत सुनिश्चित गर्ने मन्त्री दुलालले प्रतिबद्धता जाहेर गर्नुभएको छ । कार्यक्रममा प्रतिनिधिसभा सदस्य एवं पूर्वमन्त्री सूर्यमान दोङ, महाभारत गाउँपालिकाका अध्यक्ष कान्छालाल जिम्बा, महाभारत गाउँपालिका उपाध्यक्ष सागर मोक्तान, प्रदेशसभा सदस्य एवं पूर्व मन्त्री रत्नप्रसाद ढकाल लगायतको उपस्थिति रहेको थियो ।
