काभ्रे,
श्रीकृष्ण जन्माष्टमी पर्वको अवसरमा आज काभ्रेको नमोबुद्ध ७ भकुन्डेबेशीमा नवनिर्मित श्रीकृष्ण मन्दिर उद्घाटन एंव रथ यात्राको आयोजना गरिएको छ । नगरपालिका नजिकै निर्माण गरिएको कृष्ण मन्दिर नगरप्रमुख कुन्साङ लामाले आज बिहान उद्घाटन गर्नुभएको हो । नवनिर्मित श्रीकृष्ण मन्दिरबाट सुरु गरिएको रथ यात्रा भकुन्डेबजार,बुच्चाकोट ,नौबीसे हुँदै उक्त कृष्ण मन्दिर पुर्याईएको हो ।
बाजागाजा सहित प्रारम्भ भएको रथ यात्रामा लाखेनाचको समेत प्रदर्शन गरिएको छ । यसैक्रममा दाप्चा क्षेत्रमा आज हिलेजात्रा मनाईएको छ । आजराति दाप्चा क्षेत्रमा देबीभैरबको नाच प्रदर्शन गरि भोलि बाग्मति प्रदेशका सस्कृति तथा पर्यटनमंत्री दिपेन्द्र श्रेस्ठ, पर्यटन सचिव मदन कोइरालाको प्रमुख आतिथ्यतामा रथ यात्रा गरिने भएको छ ।
ज्ञानयोग, कर्मयोग र भक्तियोगका प्रणेता भगवान श्रीकृष्णको जन्म द्वापरयुगमा भाद्रकृष्ण पक्षको अष्टमी तिथिमा भएकाले यो दिनलाई ‘श्रीकृष्ण जन्माष्टमी’ र रातलाई ‘मोहरात्रि’ भनिन्छ । यस दिन देशभरिका कृष्णमन्दिरमा कृष्णको पूजा–आराधना, प्रवचन, भजनकीर्तन गर्नुका साथै व्रत बसेर रातभर जाग्राम बस्ने प्रचलन छ ।अन्याय, अत्याचार र राक्षसी प्रवृत्तिबाट सम्पूर्ण मानवको रक्षा गर्न भगवान विष्णुको आठौँ अवतारका रूपमा जन्मिएका कृष्णले आजीवन सत्यको पक्षमा रही सत्कर्मका लागि मानव समुदायलाई प्रेरित गर्नुभएको जनविश्वास रहेको छ ।
यसैबिच, श्रीकृष्ण रथ यात्रामा सहभागि भक्तजनहरुको लागि भकुन्डेबेशी जुनियर जेसिजले स्वच्छ सफा पिउँने पानीको ब्यबस्था मिलाएको थियो ।
