काभ्रे,
बुटिक सम्बन्धि आधारभूत सीप सिकिसकेका महिलाहरुलाई २ महिने एड्भान्स तालिम सम्पन्न भएको छ । रोशी ९ मंगलटारमा सम्पन्न भएको उक्त तालिममा १५ जना महिलाहरुको सहभागिता रहेको थियो । तालिमबाट महिलाहरुले साडी, कुर्ता, टप्स, व्याग, गाउन, घलेक, लेहेंगा जस्ता कपडाहरुमा विभिन्न डिजाइनका बुट्टाहरु भर्न जानिसकेको महिला बालबालिका तथा जेष्ठ नागरिक शाखाको प्रमुख प्रज्वला राईले जानकारी दिनुभयो । समापन शत्रको अध्यक्ष तथा रोशी गाउँपालिकाको उपाध्यक्ष मिम बहादुर वाईवा ज्वालाले यस बुटिक सम्बन्धि काममा लगानी, श्रम, मेहनत, बजारीकरणको सम्भावना जस्ता पक्षमा ध्यान दिएर मात्र व्यवसाय तर्फ उन्मुख हुनुपर्ने बताउनुभयो ।
रोशीको महिलाहरुले उत्पादन भएको बस्तु बजारीकरणको निम्ति आफैँ पनि लागि पर्नुपर्ने यदि बजारीकरण नभएमा सरकारले जिम्मेवारी लिनुपर्ने बताउनुभयो । जसका लागि पालिकाले उद्योग सम्बन्धि नीति बनाएर बजार प्रबर्धनको निम्ति आवश्यक जिम्मेवारी लिनुपर्ने बताउनुभयो । त्यसैगरी रोशी ९ को वडा अध्यक्ष जनम लामाले सीपको सहि सदुपयोग गर्दै सामुहिक रुपमा निरन्तरता दिन जोड दिनुभयो ।
तालिमको सहभागी जेविसा तामाङले आयोजक रोशी गाउँपालिका र महिला बालबालिका शाखालाई धन्यवाद व्यक्त गर्दै आगामी दिनमा गाउँपालिकाले रोजगारको व्यवस्थापनको निम्ति आवश्यक बजेट व्यवस्थापन गर्न सके सीप सिकेका सबै महिलाहरुले निरन्तर रुपमा अगाडि बढ्ने बताउनुभयो । तालिमको सहजिकरण भने विस्मिता लिम्बूले गरेको रोशी गाउँपालिकाको महिला बालबालिका तथा जेष्ठ नागरिक शाखाका प्रमुख प्रज्वला राईले जानकारी दिनुभयो ।
