काभ्रे,
तेमाल गाउँपालिका वडा नं. ६ स्थित बसपार्कमा रहेको एक होटलमा आगलागी हुँदा लाखौंको क्षति भएको छ । विद्युत सर्ट भएर आगलागी भएको हुनसक्ने स्थानीयको अनुमान छ । हिजो राती १२ बजे सो स्थानमा भएको अम्बर बहादुर लामाको होटलमा आगलागी हुँदा लगभग ७० लाख रुपैया बराबरको क्षति भएको अनुमान गरिएको छ ।
होटलमा भएको नगद, खाद्यान्न, लुगाफाटो सबै जलेर नष्ट भएको वडा अध्यक्ष प्रेम लामाले जानकारी दिनुभयो । उँहाको अनुसार नगद ५ लाख भएकोमा २ लाख जलेको अवस्थामा फेला परेको छ । गरगहाना भने ७ तोला सुन रहेकोमा सबै फेला परेको छ ।
स्थानीय जम्मा भएर आगो नियन्त्रणमा लिन खोजेता पनि आगो नियन्त्रणमा लिन सकिएको थिएन् । आगलागी हुँदा होटलमा रहेका ३ वटा ग्याँस सिलिन्डर मध्य २ वटा विस्फोट भएको छ । घट्नापछि पचुवारघाट प्रहरी चौकीमा जानकारी दिएको थियो । पचवारघाट प्रहरी चौकीबाट प्रहरी आएर घट्नाकोबारेमा बुझेको थियो ।
